Qazaqstanda súrip tastaýǵa jatqyzylǵan 3 myńnan astam apatty úıler bar

ASTANA. QazAqparat - Qazaqstanda 3 myńnan astam apatty úılerdi buzý kerek. Bul týraly búgin Astanada QR Ulttyq ekonomıka mınıstrligi Qurylys, turǵyn úı-kommýnaldyq sharýashylyq isteri jáne jer resýrstaryn basqarý komıteti basqarmasynyń basshysy Dáribala Aqyltaıqyzy málim etti.

«Jalpy Qazaqstan boıynsha 100 myńnan astam kóp páterli turǵyn úıler bar,onyń ishinde kúrdeli jóndeýdi 28 paıyzdan astamy qajet etedi. Súrip tastaýǵa jatqyzylǵan apatty úıler 3 myńnan asty», - dedi ol «Qazaqstandaǵy energııa tıimdi turǵyn úılerdi jobalaýdy jáne salýdy ilgeriletý» halyqaralyq konferentsııasynda. Onyń sózine qaraǵanda, osy baǵyttaǵy baǵdarlama aıasynda kúrdeli jóndeý júrgizý kezinde jylýdy paıdalanýda únemdeýdi 30 paıyzǵa deıin jetkizý boıynsha maqsat qoıylǵan. «Komıtet jańa qurylys nysandarynda ǵana emes, sonymen qatar qoldanystaǵy turǵyn úı qoryn jańǵyrtýda energııalyq tıimdilikti alǵa jyljytý boıynsha belsendi jumystardy júrgizip otyr», - dedi ol.