Qazaqstanda Sý resýrstarynyń ulttyq aqparattyq júıesi bir aı ishinde iske qosylady
ASTANA. KAZINFORM — Sý resýrstarynyń ulttyq aqparattyq júıesi iske qosylýǵa daıyndyqtyń sońǵy kezeńine jetti. Bul týraly QR Sý resýrstary jáne ırrıgatsııa vıtse-mınıstri Aslan Abdraımov Ortalyq kommýnıkatsııalar qyzmetinde ótken brıfıngte málimdedi.
Spıkerdiń aıtýynsha, Qazaqstan sý tapshylyǵy, klımattyń ózgerýi, ekonomıka men halyqtyń sý resýrstaryna degen suranysynyń artýy, sondaı-aq birqatar óńirlerdiń transshekaralyq ózenderge táýeldiligi sııaqty kúrdeli syn-qaterlerge tap bolyp otyr. Mundaı jaǵdaıda sý resýrstaryn dástúrli ádistermen ǵana basqarý jetkiliksiz. Sondyqtan naqty derekter, ýaqtyly boljamdar, ashyq esep júrgizý jáne zamanaýı tsıfrlyq quraldar qajet.
— Tsıfrlyq transformatsııanyń negizgi elementi — Sý resýrstarynyń ulttyq aqparattyq júıesi. Bul júıe — sý salasynyń biryńǵaı tsıfrlyq platformasy. Qarapaıym tilmen aıtqanda, munda sý nysandary, sý qoımalary, kanaldar, gıdrotehnıkalyq qurylystar, jerasty sýlary, sý paıdalanýshylar jáne salanyń ózge de obektileri týraly barlyq aqparat jınaqtalyp, júıelenedi, — dedi spıker.
Sonymen qatar ulttyq aqparattyq júıe sý balansyn júrgizýge, sý paıdalanýdy taldaýǵa, sý qoımalarynyń jaı-kúıin baqylaýǵa, transshekaralyq sý obektileri boıynsha derektermen jumys isteýge, sondaı-aq ǵaryshtyq monıtorıng sekildi zamanaýı quraldardy qoldanýǵa múmkindik beredi.
— Qazirgi ýaqytta júıeni iske qosýǵa daıyndyqtyń sońǵy kezeńi júrip jatyr. Aldaǵy kúnderi, bir aı ishinde ony ónerkásiptik paıdalanýǵa berip, barlyq qajetti rásimderdi aıaqtap, tolyqqandy jumysyn qamtamasyz etýdi josparlap otyrmyz, — dedi Aslan Abdraımov.
Vıtse-mınıstrdiń aıtýynsha, kelesi mańyzdy baǵyt — sý aýyl sharýashylyǵynyń negizgi resýrsy sanalatyn fermerlermen jumysty tsıfrlandyrý. Osy maqsatta «Qazsýshar» RMK aıasynda sý paıdalanýshylarmen ózara is-qımyldyń negizgi protsesteri tsıfrlyq formatqa kóshirilip jatyr. Atap aıtqanda, ótinim berý, kelisimshart jasaý, shot usyný, aktiler qalyptastyrý jáne tólemderdi baqylaý jumystary elektrondy júıege engizilip jatyr.
Bul fermerler úshin jumysty jeńildetip, qujat aınalymyn elektrondy formatqa kóshirýge, qaǵazbastylyqty azaıtýǵa, esep aıyrysý men sý jetkizýdiń ashyqtyǵyn arttyrýǵa múmkindik beredi. Al memleket úshin qansha sý suratylǵany, naqty qansha kólemde jetkizilgeni, kelisimsharttardyń oryndalýy jáne tólem tártibi týraly naqty derekter alýǵa jol ashady.
Sonymen qatar sý tutynýdy erte boljaý júıesin damytý jumystary júrgizilip jatyr. Onyń basty maqsaty — sý paıdalanýshylarǵa qansha kólemde sý qajet bolatynyn, qandaı kezeńderde jáne qaı baǵyttar boıynsha suranys artatynyn aldyn ala anyqtaý.
Bul rette tek fermerlerge ǵana emes, sý resýrstaryn kóp paıdalanatyn ónerkásiptik, kommýnaldyq jáne basqa da uıymdarǵa erekshe nazar aýdarylady. Júıe sý jetkizýdi tıimdi josparlaýǵa, naqty qajettilikti anyqtaýǵa jáne sý sharýashylyǵy uıymdary men tutynýshylar arasyndaǵy ózara is-qımyldyń ashyqtyǵyn arttyrýǵa múmkindik beredi.
— Aldaǵy ýaqytta bul júıe sýǵa degen suranysty boljaýdyń, sý resýrstaryn utymdy bólýdiń jáne olardyń tıimsiz paıdalanylý qaýpin tómendetýdiń mańyzdy quralyna aınalady, — dedi vıtse-mınıstr.
Aıta keteıik, Barlyq kásiporyn sý únemdeýdiń bes jyldyq josparyn ázirleýge mindetteledi.
