Qazaqstanda suranysqa ıe 550 negizgi mamandyqtyń tizimi jasalady
ASTANA. QazAqparat - QR Eńbek jáne halyqty áleýmettik qorǵaý mınıstrligi ekonomıkanyń mańyzdy salalaryndaǵy 550 negizgi mamandyqty anyqtaıdy jáne olardyń kásibı standarttaryn engizedi, dep habarlaıdy QazAqparat tilshisi.
«Qazirgi ýaqytta jumys berýshilerdiń birlestikterimen birigip, ekonomıkanyń suranysqa ıe salalaryndaǵy 550 negizgi mamandyqty anyqtap jatyrmyz. 2020 jylǵa deıin daǵdylar men quziretter naqty bekitilgen zamanaýı kásibı standarttardy ázirleýimiz kerek. 2018 jyldan bastap, 70 kásibı standart engiziledi jáne jyl sońyna deıin taǵy 230 standart ázirlenedi», - dep habarlady mınıstr Mádına Ábilqasymova vedomstvo alqasynyń keńeıtilgen otyrysynda.
Onyń aıtýynsha, dál osy standarttar negizinde eńbek fýnktsııalaryn, biliktilikter men quzirettilikterdi ıgerý boıynsha bilim berý baǵdarlamalary jańartylady.
«Biz eńbek kúshiniń jumystan bosap qalýyna da, eńbek resýrsynyń dástúrliden jańa ındýstrııalarǵa aýysýyna da daıyn bolýymyz kerek. Ol úshin qazirden bastap, kásibı oqytý, baǵdarlaý men jumysqa ornalasý júıelerin daıyndaý qajet», - dedi mınıstr.
