Qazaqstanda Sunkar Air atty jańa áýe kompanııasy jumysyn bastady
ASTANA. QazAqparat - Qazaqstanda Sunkar Air atty jańa áýe kompanııasy quryldy.
«Áýe kompanııasy qyzmetiniń negizgi baǵyty - avıatsııa bıznesine qyzmet kórsetý. Sonymen birge biz VIP tasymaldaýlardyń qaǵıdalary men amaldaryn saqtaı otyryp, syıymdylyǵy úlken jolaýshylar ushaǵynda áýe charterlik tasymaldaýlardy júzege asyramyz», - delingen áýe tasymaldaýshysynyń resmı saıtynda.
Atap ótilgendeı, kompanııanyń negizgi mindeti - reısti tez ári sapaly uıymdastyryp, áýe kemesiniń bortynda eń joǵary standarttarǵa sáıkes keletin jaılylyq pen qyzmet kórsetý deńgeıin usyný.
Búginde kompanııanyń áýe parkinde eki áýe kemesi bar: birinshisi - VIP tasymaldaýlardy oryndaýǵa arnalǵan 15 adamdyq Bombardier Challenger 850, ekinshisi - 148 adam syıatyn Boeing-737-300. Sondaı-aq seriktes áýe kompanııalarymen jasalǵan kelisim negizinde Embraer Legacy 650, Cessna Citation 750, Hawker 900 XP, Beechcraft Premier I ushaqtarymen tasymaldaýlar júzege asyrylady.
Sunkar Air áýe kompanııasynyń jalǵyz quryltaıshysy - onyń dırektory Talǵat Joldybaev. Kezinde ol «Invest Avıa» áýe kompanııasynyń quryltaıshysy jáne dırektory, «Eýro-Azııa Eır» tikushaq áýe kompanııasynyń vıtse-prezıdenti bolǵan. Kompanııanyń keńsesi Almaty qalasynda ornalasqan.
