Qazaqstanda súndetke otyrǵyzý qyzmeti qansha turady
Qazaqstandyq ata-analar uldaryn belgili bir jasqa jetkende súndetke otyrǵyzady. Sol kezde dáriger tańdap, qyzmet qunyn salystyra bastaıdy. Kazinform agenttiginiń tilshisi aımaqtardaǵy baǵany bildi.
Qazaqstandaǵy jeke emhanalar jáne memlekettik aýrýhanalarda súndetke otyrǵyzý qyzmeti bar. Baǵasy qyzmet túrine qaraı erekshelenedi. Hırýrgter uldardy lazermen jáne dástúrli túrde pishedi. Sonymen birge ota jasaý kezinde balalar oıyn oınaıdy nemese mýltfılm kóredi. Reıtıng jasaý kezinde hırýrg keńesi men qajetti analız tapsyrý qunyn qospaı, tek súndetke otyrǵyzý baǵasy tańdaldy.
Taraz, Pavlodar men Atyraýda qyzmet quny eń tómen bolyp shyqty. Munda baǵa 10 myń teńgeden bastalady.
Shymkentte hırýrgterdiń qyzmeti sál joǵary. Qazir 12 000 teńge bolyp tur. Kishkentaı balalardy ǵana emes, eresek er adamdardy da pishtiredi. Kóbine medıtsınalyq kórsetkish sebep bolyp jatady. Shymkentte bul qyzmet quny 30 myńnan bastalyp, 50 myń teńgege deıin jetedi.
Kókshetaý, Aqtaý, Qostanaı men Taldyqorǵanda súndetke otyrǵyzý quny 15 myń teńgeden bastalady.
Sodan keıingi orynda Aqtóbe tur. Munda súndetke otyrǵyzý qyzmeti 18 000 teńgeden bastalady. Bala Sony PlayStation oınaıtyn bolsa, jeke emhanalar 25 000 teńge suraıdy.
Túrkistan, Jezqazǵan, Semeı, Qyzylorda qalalarynda qyzmet quny 20 myń teńgeden bastalady. Túrkistannyń keıbir aýylynda súndetke otyrǵyzý tegin. Tek ózińiz syı-qurmet kórsetseńiz bolady.
Al Qyzylordada hırýrgtiń súndetke otyrǵyzý qyzmeti tek jeke emhanalarda bar. Al oblystyq balalar aýrýhanasynda bul qyzmet qarastyrylmaǵan.
Baǵasy joǵary óńirlerdiń úshtigine Óskemen men Astana kiredi. Munda súndetteý qyzmeti 25 myń teńgeden bastalady. El astanasynda balanyń jaılylyǵy úshin qosymsha 10-15 myń teńge tóleý kerek.
Reıtıng boıynsha ekinshi orynda Qaraǵandy, Oral men Almaty qalalary tur. Munda baǵa 30 myńnan bastalady. Almatydaǵy keıbir klınıkada súndetke otyrǵyzý qyzmeti 100 myń teńgege deıin jetedi.
Elimizde súndetke otyrǵyzý qyzmetiniń eń qymbaty Petropavlda bolyp shyqty. Munda hırýrg qyzmeti 35 myń teńgeden bastalady.
Aıtyp óteıik, keıbir klınıkada hırýrg, anestezıologtan keńes alý, analız tapsyrý mindetteledi. Munyń árbirine bólek-bólek aqsha tóleý kerek.
Kazinform buǵan deıin elektrık pen santehnıktiń qyzmet aqysyn bildi.