Qazaqstanda sulýlyq baıqaýlarynyń jeńimpazdary atanǵan arýlar (FOTO)

2013 jyldyń jeltoqsan aıynda «Qazaqstan arýy» ataǵyn 24 jastaǵy almatylyq Aıdaı Isaeva jeńip alǵan bolatyn. Bir jyldan keıin ol «Álem arýy-2014» baıqaýyna da qatysty. Qazir, Aıdaı turmysta, bir uly bar. Bolashaqta sán bıznesindegi jumysy men dárigerlik qyzmetin jalǵastyrǵysy keledi.

Aıdaı Isaevadan keıin «Qazaqstan arýy-2014» baıqaýyn almatylyq Regına Vandysheva jeńip aldy. Altyn tájge ıe bolǵan ol, kelesi jyly «Álem arýy-2015» baıqaýyna qatysty. Regına sportpen belsene shuǵyldanady. Qazir ol - jeńil atletıka boıynsha sport sheberligine kandıdat.

Ótken jyly Regına Vandysheva «Qazaqstan arýy-2015» baıqaýynyń altyn tájin Aqtaý qalasynyń arýy Álııa Mergenbaevanyń basyna kıgizdi. 17 jastaǵy arý baıqaý kezeńderiniń birinde súıikti kitaby týraly suraqqa: «kitap oqymaımyn», - dep jaýap berip, kópshilikti tań qaldyrǵan bolatyn. Bireýler ony aıyptasa, endi bireýler shyn jaýap bergeni úshin rıza da bolysty. Degenmen, sál keıinirek, Álııa óziniń bergen jaýabyn kópshiliktiń durys túsinbegendigin, kitap oqıtyndyǵyn, biraq tek óz salasy, ıaǵnı «Qonaq úı bıznesi» mamandyǵy boıynsha oqıtyndyǵyn, al basqa kitaptardy oqýǵa ýaqyty joqtyǵyn aıtyp aqtaldy.

Al «Kóktem arýy-2016» baıqaýynda Mańǵystaý óner kolledjiniń stýdenti Ádemaı Ashyqbaevanyń baǵy jandy. Bul baıqaýǵa qaladaǵy joǵary jáne orta bilim mekemelerinen 12 boıjetken qatysqan bolatyn. «Sálemdesý» atty birinshi kezeńde baıqaýǵa qatysýshylar ózderi týraly qysqasha baıandaýǵa tıis boldy. «Defıle» atty ekinshi kezeńde boıjetkender qazaqsha kıim úlgisin kórsetti. «Suraqtar men jaýaptar» atty úshinshi kezeńde qatysýshylar qazaqtyń salt-dástúrleri jáne el táýelsizdigine qatysty suraqtarǵa jaýap berdi. Al «Talanttar baıqaýy» atty tórtinshi kezeńde olar ózderiniń án, bı jáne aqyndyq sheberligin tanytty.

«QazUÝ arýy-2015» ataǵyn hımııa jáne hımııa tehnologııasy fakýltetiniń 3-shi kýrs stýdenti Aısulý Baıseńgirova jeńip aldy.

Baıqaý aıasynda ótken daryndylar baıqaýynda Aısulý Uly Otan soǵysyna qatysqan óziniń atasy týraly qoıylym kórsetti. Sóıtip, kórermender men qazylar alqasynyń ystyq yqylasyna bólengeni belgili.

Al astanalyq orta mekteptiń 11-shi synyp oqýshysy Alena Lysak «Han Shatyry arýy-2015» ataǵyn jeńip aldy. Sondaı-aq, oǵan júlde retinde 10 myń dollar tabys etildi. Boıjetken bul aqshany ýnıversıtettegi oqýyna jumsaıtyndyǵyn aıtty.

Al Innovatsııalyq gýmanıtarlyq ýnıversıtettiń stýdenti Kámıla Temirova «Astana arýy-2015» baıqaýynda jeńimpaz atandy.

Pavlodar qalasyndaǵy №20-shy mektep-lıtseıdiń 16 jastaǵy oqýshysy Sofııa Sharıkova «Pavlodar arýy-2015» baıqaýynyń eń jas qatysýshysy bolǵan edi. Alaıda, óziniń bilimdarlyǵy jáne tabıǵı bolmysymen qazylar alqasynyń rızashylyǵyna bólenip, basyna altyn táj kıdi.

«Shymkent arýy-2015» baıqaýyn 18 jastaǵy Aqmóldir Ábdirahmanovanyń jeńip alǵanyn bilesizder. Oǵan júlde retinde 100 myń teńgeniń sertıfıkaty tabys etildi. Osylaısha, Aqmóldir Shymkent qalasy atynan «Qazaqstan arýy-2015» baıqaýyna qatysý quqyǵyna ıe boldy.

«Petropavl arýy-2015» baıqaýynda Soltústik Qazaqstan memlekettik ýnıversıtetiniń stýdenti, bolashaq qarjyger Alına Hlevova úzdik dep tanyldy.

Ári qaraı kettik, «Kókshetaý arýy-2015» baıqaýy «Kókshetaý» saraıynda ótti. Oǵan 12 boıjetken qatysty. Baıqaý qorytyndysy boıynsha Sh. Ýálıhanov atyndaǵy Kóksheteý memlekettik ýnıversıtetiniń 21 jastaǵy stýdenti Janna Haırýllına Kókshetaý qalasynyń aqylyna kórki saı eń sulý arýy atandy.

Al «Oral arýy-2015» baıqaýyn 18 jastaǵy Veronıka Zlata jeńip aldy. Qazylar alqasy onyń bilimdiligin, symbattylyǵyn jáne kópshilik aldynda ózin ustaı bilý qabiletin joǵary baǵalady.

«Almaty arýy-2015» baıqaýynda Qazaqtyń sport jáne týrızm akademııasynyń túlegi, 20 jastaǵy arý Regına Valter jeńimpaz atandy.

Al «Taldyqorǵan arýy-2015» baıqaýyn І. Jansúgirov atyndaǵy Jetisý memlekettik ýnıversıtetiniń stýdenti Aıdana Qanaıbaeva jeńip aldy.

«Qostanaı arýy-2015» baıqaýynyń altyn tájin Qostanaı pedagogıkalyq kolledjiniń 19 jastaǵy stýdenti Ksenııa Brýma kıdi. 18 jastaǵy Renata Nurǵazına bolsa, «Qaraǵandy arýy-2015» baıqaýynyń jeńimpazy atandy.