Qazaqstanda sýıtsıdke ıtermeleýge qylmystyq jaýapkershilik engizilmek
ASTANA. QazAqparat - Qazaqstanda adamnyń ózine-ózi qol jumsaýǵa ıtermeleý faktilerine qylmystyq jaýapkershilik engizilmek. Bul týraly Parlament Májilisinde tilshilerge QR Іshki ister mınıstriniń orynbasary Rashıd Jaqypov málim etti, dep habarlaıdy QazAqparat.
Aıta keteıik, búgin Májilistiń jalpy otyrysynda palata depýtattary «Balalardy densaýlyǵy men damýyna zardabyn tıgizetin aqparattan qorǵaý týraly» zań jobasyn talqylap, birinshi oqylymda maquldady.
«Kóndirý, usynys, aldaý nemese basqa da tásildermen (sýıtsıdke) ıtermeleý jaǵdaıynda qylmystyq jaýapkershilik bolýy tıistigin depýtattar usynyp otyr. Adamdy ózine qol jumsaýǵa ılandyrý oqıǵalaryna depýtattar qylmystyq jaýapkershilikti belgileýdi usyndy», - dep túsindirdi R. Jaqypov.
Osy oraıda ol búginde ózine-ózi qol jumsaýǵa ıtermeleýge qandaı is-qımyldy jatqyzý kerektigin aıqyndap alý mańyzdy ekenin jetkizdi.
«Zań jobasynyń ekinshi oqylymyna deıin biz depýtattarmen birge osy máseleni pysyqtaımyz dep oılaımyn. Atalǵan jaǵdaılarǵa túrtki bolatyn aqparatty taratý áreketterine tyıym salýdy jáne onyń zańmen qýdalanýyn qarastyryp otyrmyz», - dedi vıtse-mınıstr.
Onyń sózine qaraǵanda, qazirgi kezde adamdy ózine qol jumsaýǵa ıtermelegeni úshin qylmystyq jaýapkershilik kózdelmegen. Elimizde qorqytý, kemsitý nemese qatygezdikpen qaraý jolymen adamnyń ózine-ózi qol jumsaýǵa deıin jetkizýge qylmystyq jaýapkershilik qarastyrylǵan.
«Biz osy problemamen aınalysqan edik. 2017 jyldyń barysynda 904 saıtty anyqtadyq, ıaǵnı olar tyıym salynǵan ári sýıtsıdtik aqparatty taratýǵa baǵyttalǵan. Sáıkesinshe, bul saıttar buǵattaldy», - dedi Rashıd Jaqypov.
