Qazaqstanda sýıtsıdke beıim 4 myńnan astam bala anyqtaldy
ASTANA. QazAqparat - Óńirler ákimdikterine sýıtsıdke beıim jastarǵa arnalǵan statsıonarlar qurý tapsyryldy. Bul jaıynda depýtattyq saýalǵa berilgen QR Premer-Mınıstriniń orynbasary Erbolat Dosaevtyń jaýabynda aıtylǵan, dep habarlaıdy QazAqparat.
«Balalar men jasóspirimderdiń sýıtsıdtik minez-qulqynyń aldyn alý jónindegi 2019 jylǵa deıingi jol kartasyn der ýaqytynda ári sapaly júzege asyrý maqsatynda jergilikti atqarýshy organdarǵa «táýekel tobyndaǵy» balalardy anyqtaý, sýıtsıdke áreket jasaǵan balalarǵa sáıkesinshe qoldaýdy qamtamasyz etý boıynsha sharalar qabyldaý tapsyryldy. Onyń ishinde balalar kúndiz bolatyn statsıonar jumysyn uıymdastyryp, jasóspirimder sýıtsıdiniń aldyn alý máseleleri boıynsha úkimettik emes uıymdardyń memlekettik organdarmen ózara is-qımylyn kúsheıtý, sondaı-aq kámeletke tolmaǵandar arasynda sýıtsıdtiń aldyn alý jobalaryn júzege asyrýǵa jergilikti bıýdjetten qarjy qarajatyn qarastyrý júkteldi», - delingen jaýapta.
Jergilikti atqarýshy organdardyń málimetinshe, QR Úkimeti janyndaǵy densaýlyqty qorǵaý jónindegi ulttyq úılestirý keńesi otyrysynyń hattamasyn oryndaý aıasynda kámeletke tolmaǵandar arasyndaǵy sýıtsıdtiń aldyn alý baǵdarlamasyn júzege asyrýǵa 240 mlrd teńgeden astam qarjy bólingen. Atalǵan qarajat Aqmola, Aqtóbe, Atyraý, Jambyl, Batys Qazaqstan, Qaraǵandy, Qostanaı, Qyzylorda, Mańǵystaý, Pavlodar, Soltústik Qazaqstan oblystarynyń jáne Almaty men Astana qalalarynyń jergilikti bıýdjetinen bólingen. Al Almaty, Shyǵys Qazaqstan, Ońtústik Qazaqstan oblystarynda baǵdarlamany engizýdi qarjylandyrýǵa jergilikti bıýdjette qarjy bolmaýyna baılanysty - keıinge shegerildi. Qazirgi ýaqytta QR Bilim jáne ǵylym mınıstrligi óńirlerde baǵdarlamany qarjylandyrý úshin bıýdjettik ótinim daıyndady. Atalǵan qujat respýblıkalyq bıýdjettik komıssııa otyrysynda 2018 jylǵa arnalǵan bıýdjetti naqtylaý barysynda qaralady.
«Atalǵan qarajat esebinen baǵdarlama aıasynda 2427 pedagog-psıholog oqytylyp, onyń 2088-i bilim berý uıymdarynyń pedagog-psıhologtaryn oqytýǵa múmkindik beretin sheber jattyqtyrýshy sertıfıkatyn aldy. Sonymen qatar densaýlyq saqtaý salasynda 3 myńnan astam pedıatr, psıhıatr, narkolog jáne mektep dárigerleri oqytyldy», - delingen vıtse-premer jaýabynda.
Sońǵy 2 jylda baǵdarlama 2742 bilim berý uıymyn, onyń ishinde 2245 mektepti, 296 kolledjdi qamtydy. «Sýıtsıdke beıim joǵary táýekel tobyna» jatatyn balalardy anyqtaý maqsatynda saýalnama ótkizildi. Nátıjesinde táýekeli joǵary 4412 bala anyqtaldy. Onyń 1470-si bilikti medıtsınalyq kómek alý úshin dárigerlerdiń qaraýyna jiberildi.
