Qazaqstanda sýıtsıdke barmaq bolǵan 114 bala qutqaryldy -Balıeva
ALMATY. QazAqparat - Qazaqstanda 2017 jyly ózine qol salmaq bolǵan 114 bala raıynan qaıtty. Bul týraly Qazaqstandaǵy Bala quqyqtary jónindegi ýákili, QR Parlamenti Májilisiniń depýtaty Zaǵıpa Balıeva aıtty, dep habarlaıdy QazAqparat tilshisi.
Alqaly jıynǵa QR Bilim jáne ǵylym, Densaýlyq saqtaý mınıstrligi, BUU balalar qory (ıÝNISEF), Bilim Foundation qoǵamdyq qory, Respýblıkalyq psıhıkalyq densaýlyq ǵylymı-praktıkalyq ortalyǵy, pedagog psıhologtar, sheteldik sarapshylar qatysty.
Ombýdsmen Qazaqstan jasóspirimderi arasyndaǵy sýıtsıd máselesiniń ózektiligin aıtty.
«Búgingi konferentsııanyń mańyzy óte tereń. Búgingi zaman talaby erekshe. Balalarymyz túrli synaqtarǵa tap bolyp jatyr. Qazirgi kezde jasóspirimder psıhologııalyq turǵydan myqty bolýy kerek. Búgin sheteldik sarapshylar ózderiniń tájirıbelerimen bólisedi», - dedi Zaǵıpa Balıeva Almatyda Ál-Farabı atyndaǵy Qazaq ulttyq memlekettik ýnıversıtetinde ótken konferentsııa barysynda.
Onyń aıtýynsha, sýıtsıdtiń aldyn alý qoǵamdaǵy mańyzdy rólge ıe.
«Birinshi kezekte halyqtyń, qoǵamnyń mentalıtetin ózgertý kerek. Balalar problemasyn ashyq aıtýdy úıretý qajet. Qazirgi kezde psıhıatrǵa baryńyz dese, bári qorqady, teris qabyldaıdy. Bir qýanarlyq jaǵdaı Qazaqstanda ótken jyldarmen salystyrǵanda 2017 jyly sýıtsıd kórsetkishteri tómendep kele jatyr. Osy baǵytta arnaıy jeli jumys isteıdi. Endi balalarǵa uıaly telefon arqyly zvondaýǵa múmkindik bar. Ótken jyly 114 balanyń ómirin saqtap qaldyq. 5000-nan astam psıhologııalyq kómek kórsetildi», - dedi halyq qalaýlysy.
Sheteldik mamandardyń aıtýynsha, jyl saıyn álemdegi jasóspirimderdiń 10%-y túrli aýytqýǵa ushyrap, dene múshelerin zaqymdaıdy. Sonyń saldarynan 67 000 jasóspirim kóz jumady.
