Qazaqstanda sýǵa uqypty qaraý mádenıeti kúsheıtilip jatyr

Sońǵy bes jylda festıval elimizde ǵylymdy nasıhattaıtyn iri alańdardyń birine aınaldy. Búginde ol mektep oqýshylary men pedagogterden bastap, ǵalymdar jáne shyǵarmashylyq ındýstrııa ókilderine deıin myńdaǵan qatysýshyny biriktirip otyr. 

Bıyl festıvaldiń basty taqyryby sýǵa arnaldy. Sý — tirshilik úshin mańyzdy resýrs ári turaqty damýdyń negizgi syn-qaterleriniń biri.

«Sý resýrstarynyń aqparattyq-taldaý ortalyǵy» KEAQ basqarma tóraǵasy Qaıratǵalı Haırýllanyń aıtýynsha, sý tapshylyǵy artyp otyrǵan jaǵdaıda sýdy utymdy paıdalaný mádenıetin qalyptastyrý mańyzdy mindetterdiń birine aınalyp otyr.

— Qazaqstandaǵy sý resýrstarynyń shamamen 56%-y el aýmaǵynda qalyptasady. Al jer ústi sýlarynyń 44%-y transshekaralyq ózender arqyly keledi. Bul — Reseı, Qytaı, Ózbekstan, Qyrǵyzstan jáne ishinara Tájikstan. Sondyqtan sý dıplomatııasyn damytý jáne resýrstardy utymdy paıdalaný mańyzdy, — dedi ol.

Onyń aıtýynsha, Sý resýrstary jáne ırrıgatsııa mınıstrligi qurylǵannan beri jumys úsh negizgi baǵyt boıynsha júrgizilip keledi. Olar — transshekaralyq sýlardy tıimdi bólý, sý únemdeý tehnologııalaryn engizý jáne sýǵa uqypty qaraý mádenıetin qalyptastyrý.
Resmı derekterge sáıkes, Qazaqstanda sýdyń shamamen 60%-y aýyl sharýashylyǵynda paıdalanylady. Ónerkásipke 30% tıesili, al turmystyq qajettilikke 10%-y ǵana tıesili. Degenmen, kúndelikti turmystaǵy daǵdylar sýǵa degen jalpy kózqarasty qalyptastyrýda mańyzdy ról atqarady.

— Sý únemdeý mádenıeti ár adamnan bastalady: aldymen otbasynda, ata-ananyń úlgisi arqyly, keıin mektepte qalyptasady. Osyǵan baılanysty ótken jyldan beri Astana men óńirlerdegi bilim berý uıymdarynda ekosaǵattar turaqty ótkizilip keledi. Memleket basshysy Qasym-Jomart Toqaev atap ótkendeı, sý — strategııalyq resýrs. Sondyqtan sýǵa uqypty qaraý mádenıetine erekshe nazar aýdarý qajet, — dedi Qaıratǵalı Haırýlla.

Aıta keteıik, 22–24 sáýir kúnderi Astanada sý únemdeý tehnologııalary talqylanatyn alǵashqy Óńirlik ekologııalyq sammıt ótedi.