Qazaqstanda sýdy basqarý salasy jetildirýdi qajet etedi - EO jobasy
aýryzdyń 11-i. QazAqparat /Qanat Mámetqazyuly/ - Qazaqstanda sýdy basqarý salasy jetildire túsýdi qajet etedi.
Bul týraly búgin QR Parlamenti Májilisinde Eýropalyq Odaqtyń «Qazaqstan Respýblıkasynda ekologııalyq saıasattyń quraldaryn engizý» atty jobasynyń tanystyrlymy barysynda jobanyń bas sarapshysy Bolat Esekın málim etti, dep habarlaıdy QazAqparat.
«Qazaqstanda sý máselesi túrli vedomstvolarmen, bytyrańqy túrde basqarylady, ol boıynsha ókilettik birqatar mınıstrlikterge, aýmaqtyq organdarǵa bólinip ketken. Elimizde qyzmet etetin barlyq derlik halyqaralyq uıymdar, halyqaralyq baıandamalar men ókildikter Qazaqstandaǵy sýdy basqarý mártebesin kúsheıtý qajettigin alǵa tartady. Sonymen birge, elimizde sýdy basqarý salasyndaǵy standarttardyń túgeli eskirgen, ótken ǵasyrdyń 50-shi jyldary engizilgen standarttar bolyp tabylady. Keıbir oblystarda sýǵa qatysty tarıfter nóldik deńgeıdi quraıdy. Bul ásirese aýyl sharýashylyǵy salasyna qatysty bolyp otyr. EO jobasy sarapshylarynyń paıymynsha, «nóldik» tarıf sýdy únemdeýmen qosa, osy salaǵa ınvestıtsııa tartýǵa da kedergi bolady. Bunymen qosa, ınfraqurylymdy qalpyna keltirý, jańa tehnologııalar engizý máseleleriniń barlyǵy tarıf saıasatynyń salmaqtylyǵyn qajet etedi», dedi B. Esekın.
Onyń sózine qaraǵanda, sýǵa qatysty eshbir tarıf bolmaǵan jerde, sol sektorǵa jeke ınvestorlardy tartý da qıyn. Óıtkeni qandaı da bolmasyn ınvestorlar eń aldymen ınvestıtsııanyń qaıtarymyn boljaıdy.
