Qazaqstanda sýdyń «qara naryǵyna» qarsy anonımdi chat-bot iske qosyldy
ASTANA. KAZINFORM – Sý resýrstary jáne ırrıgatsııa mınıstrligi sýarý maýsymynda sýdy ádil bólý jáne quqyqbuzýshylyqtardyń aldyn alý maqsatynda Telegram messendjerinde «Sýdyń qara naryǵyna jol joq!» chat-botyn iske qosty.
Joba «Zań jáne tártip» qaǵıdatyn iske asyrý aıasynda qolǵa alynǵan.
Vedomstvo málimetinshe, chat-bot arqyly azamattar sý berý jáne bólý qyzmetteri kezindegi zańbuzýshylyqtar, sybaılas jemqorlyq faktileri jáne basqa da quqyqqa qaıshy áreketter týraly jedel habarlaı alady.
Sondaı-aq paıdalanýshylar qajetti aqparatty qysqa merzimde alý múmkindigine ıe bolady.
Chat-botty iske qosý úshin «Qazsýshar» RMK-nyń fılıaldary men óndiristik ýchaskelerinde ornalastyrylǵan QR-kodty skanerleý qajet.
Júıe qazaq jáne orys tilderinde jumys isteıdi ári anonımdi túrde ótinish joldaýǵa múmkindik beredi.
– Sýdyń «qara naryǵymen» kúres ashyqtyqty jáne sybaılas jemqorlyqqa qarsy belsendi sharalardy talap etedi. Osy maqsatta mınıstrlik quqyq qorǵaý organdarymen kúsh biriktirdi. Sonymen qatar sý berý boıynsha elektrondy kelisimshart jasaý júıesi men jerdi qashyqtan zondtaý negizindegi ǵaryshtyq monıtorıng sııaqty zamanaýı tsıfrlyq quraldar keńinen engizilip jatyr, – dedi Sý resýrstary jáne ırrıgatsııa mınıstri Nurjan Nurjigitov.
Mınıstrdiń aıtýynsha, vedomstvo sýarý kezeńinde «Qazsýshar» RMK fılıaldary men óndiristik bólimsheleriniń qyzmetine tolyq baqylaý ornatýdy kózdep otyr.
Chat-bot Sý resýrstary jáne ırrıgatsııa mınıstrligi men Bas prokýratýra birlesip bekitken sýdyń «qara naryǵyn» joıý jónindegi jol kartasy aıasynda ázirlengen.
Mınıstrlik málimetine sáıkes, 2026 jyldyń basynan beri basseındik ınspektsııalar zańsyz sý alý derekteri boıynsha jalpy somasy 41 mln teńgege 99 ákimshilik aıyppul salǵan.
Aıta keteıik, Orynbordaǵy Irekli qoımasynan Jaıyqqa jiberiletin sý kólemi qaıta kóbeıdi.
