Qazaqstanda sýda júzetin ámbebap jaýyngerlik kólik qurastyrylatyn boldy
ASTANA. KAZINFORM – Elordada «Qazaqstan Paramaýnt Injınırıng» kompanııasy sýda júze alatyn «Terrex Barys-A 8x8» jaýyngerlik kóligin tanystyrdy.
Bul brondalǵan kópmaqsatty amfıbııalyq jaýyngerlik kólik — sıngapýrlyq «Singapore Technologies Engineering» kompanııasynyń ónimi. Ony qurastyrýǵa, jetildirýge quqyq beretin barlyq qujattardy Qazaqstan tarapy satyp alǵan. Aldaǵy ýaqytta áskerı mashına túrli aýa raıy jáne tabıǵı jaǵdaıda aýyr synaqtardan ótýi tıis. Aptap ystyq pen sary aıazda, batpaq pen qumda óziniń minsizdigin dáleldeı alsa ǵana, jappaı qurastyrýǵa joldama alady.
— Terrex Barys-A — qazirgi ýaqyttyń tehnologııalaryna saı áskerı kólik. Qazaqstanda jasalǵan, qazaqtyń qolymen jasalǵan, qazaqtyń sarbazyna jasalǵan. Bizdiń azamat retinde ǵana emes, kásipker jáne óndirýshi retindegi mindetimiz — jaýyngerlerimizdiń ómirin saqtaý, - deıdi Qorǵanys-ónerkásip kesheni kásiporyndary qaýymdastyǵynyń tóraǵasy Aıbek Barysov.
Otandyq áskerı kólik ishindegi jaýyngerdi 10 keli trotıldyń jarylysynan qorǵaı alady. Tankige qarsy mınanyń ózinde 7 keli trotıl bolatynyn eskersek, kópmaqsatty jaýyngerlik kóliktiń qorǵanysh deńgeıin joǵary sanatqa jatatynyn túsinemiz.
— Armııa mobıldi, kásibı jáne zamanaýı qarý-jaraqpen qamtylǵan bolýy kerek. Sebebi bizdiń basty maqsat – memleketimizdiń konstıtýtsııalyq qurylymyn, terrıtorııalyq tutastyǵyn saqtaý. Osyndaı ónimder áskerimizdiń qýatyn arttyrady, - dedi QR Qorǵanys mınıstri Rýslan Jaqsylyqov.
«Terrex Barys-A 8h8» brondalǵan dońǵalaqty mashınasy ámbebap platformaǵa ornalastyrylǵan. Ondaı platformany BTR, brondy ásker tasymaldaýshy kólik, dońǵalaqty tank, 120 mm jyljymaly mınomet, komandalyq-shtabtyq mashına, áskerı-barlaýshy mashına, jaqyn qashyqtyqtaǵy zenıttik-raketalyq keshen jasaýda qoldanýǵa bolady. Osylaısha Qazaqstannyń brondy áskerı kólikteriniń ámbebap tutas tizbegin qalyptastyryp, ony ustaý men jóndeý shyǵyndaryn azaıtýǵa bolady.
Terrex Barys-A 12 jaýyngerdi tasymaldaı alady, ekıpajy – 2 adam. Boıynda 600 attyń kúshi bar.