Qazaqstanda sýdıanyń kásibı qyzmetin baǵalaý zań arqyly belgilenedi - Senat
ASTANA. QazAqparat - Búgin Senattyń Konstıtýtsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysynda «Qazaqstan Respýblıkasy Joǵary Sot Keńesi týraly» zań jobasy qaraldy. Zań jobasy memlekettiń bes ınstıtýtsıonaldyq reformasyn iske asyrý jónindegi «100 naqty qadam» Ult josparyn atqarý maqsatynda ázirlengen.
Zań jobasyna sáıkes, Joǵary Sot Keńesi Qazaqstan Respýblıkasy Prezıdentiniń sottardy qalyptastyrý, sýdıalardyń táýelsizdigi men eshkimniń tıispeý kepildikteri jónindegi konstıtýtsııalyq ókilettikterin qamtamasyz etý maqsatynda qurylatyn avtonomdy memlekettik mekeme bolyp tabylatyndyǵy aıqyndaldy. Keńes quramyna Joǵarǵy Sottyń Tóraǵasy, Bas Prokýror, Ádilet mınıstri, memlekettik qyzmet isteri jáne sybaılas jemqorlyqqa qarsy is-qımyl jónindegi ýákiletti organnyń basshysy, Parlament Senaty men Májilisiniń tıisti turaqty komıtetteriniń tóraǵalary, sýdıalar men otstavkadaǵy sýdıalar taǵaıyndalady, sondaı-aq basqa adamdar da, onyń ishinde ǵalym zańgerler, advokattar, sheteldik sarapshylar, Sýdıalar odaǵynyń ókilderi taǵaıyndalýy múmkin.
Zań jobasynda laýazymy boıynsha Keńes músheleri men sheteldik sarapshylardy qospaǵanda, Keńes músheleri óz ókilettikterin júzege asyrý kezeńinde negizgi jumys orny boıynsha mindetterin oryndaýdan bosatylatyny belgilengen. Sýdıalar jáne memlekettik qyzmetshiler bolyp tabylatyn Keńes músheleriniń negizgi jumys orny boıynsha jalaqysy saqtalady. Zań jobasyn talqylaý barysynda Komıtet Májilis maquldaǵan zań jobasyna sýdıalyqqa kandıdattardyń jumys ótiline qoıylatyn talaptardy túzetýdi kózdeıtin ózgerister engizýdi usyndy.
Budan bólek, komıtet otyrysynda «Qazaqstan Respýblıkasynyń keıbir konstıtýtsııalyq zańdaryna Joǵary Sot Keńesi, sot júıesi jáne sýdıalardyń mártebesi máseleleri boıynsha ózgerister men tolyqtyrýlar engizý týraly» zań jobasy da qaraldy. Qujatta negizinen sýdıalyqqa kandıdattarǵa qoıylatyn talaptardy kúsheıtýge baǵyttalǵan normalar kózdelgen. Sondaı-aq sýdıanyń kásibı qyzmetin baǵalaý belgilenedi, alǵash ret ol sýdıa laýazymyndaǵy bir jyldyń nátıjeleri boıynsha, al keıinnen ár bes jyl saıyn júrgiziletin bolady. Bul rette jıyrma jáne odan da kóp jyl sýdıalyq ótili bar sýdıalar sýdıanyń kásibı qyzmetin merzimdi baǵalaýdan bosatylady.
Sýdıanyń otstavkaǵa shyǵýy úshin sýdıalyq jumys ótili on bes jyldan jıyrma jylǵa ulǵaıtylady.
Zań jobasy aldaǵy ýaqytta ótetin palatanyń jalpy otyrysyna shyǵarylatyn bolady.
