Qazaqstanda sýdıalarǵa memlekettik tildi bilý mindetteledi

ASTANA. QazAqparat - Qazaqstanda sýdıalarǵa memlekettik tildi bilý mindetteledi. Bul týraly búgin QR Prezıdenti janyndaǵy OQK-inde ótken brıfıngte QR Joǵarǵy Soty Qylmystyq ister jónindegi qadaǵalaýshy sot alqasynyń tóraǵasy Abaı Rahmetýlın málim etti.

«Sýdıa laýazymyna biliktilik emtıhanyn tapsyrý talaptaryn qaıta qaraýdy qajetsinedi. Onyń negizi retinde Germanııa tájirıbesi alynýy múmkin. Onda sýdıalardy daıyndaý jazbasha emtıhan men tájirıbelik oqytýdyń birneshe kezeńimen júrgiziledi. Atap aıtqanda, zańnamalyq deńgeıde usynys ınstıtýtyn, «A» korpýsyna kandıdattardy irikteýdegideı memlekettik tildi bilýine arnalǵan testileýdi engizý máselelerin qarastyrý usynylýda», - dedi ol.

Sonymen qatar ol sýdıa laýazymyna usynylǵan tulǵaǵa bir jyldyq synaq merzimin engizý máselesi de qaralyp jatqanyn atap ótti.

«Atalǵan merzim aıaqtalǵannan keıin turaqty negizde sýdıa laýazymyna taǵaıyndaý týraly másele halyqaralyq standarttarǵa sáıkes sot tóreligi qorytyndylarynyń negizinde joǵarǵy sot keńesimen sheshilýi qajet», - dedi A.Rahmetýlın.