Sýbsıdııalar boıynsha bereshek kezeń-kezeńmen ótelip jatyr - AShM

ASTANA. KAZINFORM - QR Aýyl sharýashylyǵy mınıstrliginiń málimetinshe, agroónerkásiptik keshende barlyq túrdegi sýbsıdııalar boıynsha bereshek 341,3 mlrd teńgeni quraıdy, onyń 152,2 mlrd teńgesi nesıeler boıynsha paıyzdyq mólsherlemelerdi sýbsıdııalaýǵa tıesili.

QR Aýyl sharýashylyǵy mınıstrligi baspasóz qyzmetiniń habarlaýynsha, bereshek barlyq óńirlerde bar. Eń kóbi Aqmola, Qostanaı jáne Soltústik Qazaqstan oblystarynda tirkelgen, jıyny 173,7 mlrd teńge, bul jalpy somanyń 51%-yn quraıdy.

Degenmen, sýbsıdııalar boıynsha bereshek birtindep azaıyp keledi, tek bıyldyń ózinde 148,5 mlrd teńge qaryz óteldi.

«Agroónerkásiptik keshendi jáne aýyldyq aýmaqtardy memlekettik retteý týraly» QR Zańyna sáıkes, sýbsıdııalardy tóleý jergilikti atqarýshy organdar arqyly júzege asyrylady.

2023 jyldan bastap agrarlyq sektordy sýbsıdııalaýǵa arnalǵan barlyq shyǵystar jalpy sıpattaǵy transfertter týraly zań aıasynda jergilikti bıýdjetterge júktelgen.

Bıyl jergilikti bıýdjetterde agroónerkásiptik keshendi sýbsıdııalaýǵa 433,6 mlrd teńge qarastyrylǵan, onyń bir bóligi ótken jyldardaǵy «kútý tizimderi» boıynsha bereshekti óteýge baǵyttalady.

Aýyl sharýashylyǵy mınıstrligi óńirlerdiń ákimdikterine tólemderdi jedeldetý úshin qosymsha qarajat kózderin tabýdy, sonyń ishinde qoldanystaǵy baǵdarlamalar sheńberinde qarajatty qaıta bólý jáne basqa da ishki rezervter esebinen usynyp otyr.

Úkimet jergilikti bıýdjetterdiń shekteýli múmkindikterin eskere otyryp, respýblıkalyq rezerv qarajaty esebinen qosymsha qoldaý kórsetip otyr.

Mysaly, byltyr óńdeýge tapsyrylǵan qant qyzylshasyn sýbsıdııalaýǵa 10 mlrd teńge bólindi.

Bıyl qosymsha 57,8 mlrd bólindi, onyń 48,4 mlrd somasy tyńaıtqyshtardyń qunyn sýbsıdııalaýǵa, al 9,4 mlrd qant qyzylshasy óndirýshilerin qoldaýǵa arnalady.

Aýyl sharýashylyǵy taýar óndirýshilerine sýbsıdııa tólemderi josparly túrde júrgizilip jatyr. Mınıstrlik ákimdikterimen birlesip, bereshekti azaıtý jáne sýbsıdııalaý tetiginiń ashyqtyǵyn arttyrý baǵytynda júıeli jumys júrgizip jatyr.

Basty maqsat - fermerlerge ýaqytyly qoldaý kórsetý jáne agroónerkásiptik keshenniń turaqty damýyna qajetti qarjylyq jaǵdaı jasaý.

-Aıta keteıik, sońǵy eki jylda agrarlyq salada aýyl sharýashylyǵy tehnıkasyn jeńildetilgen nesıe jáne lızıng arqyly alý tájirıbesi engizildi. Bul sharýalarǵa tehnıka parkin jańartýǵa, ónimdilikti arttyrýǵa jáne óndiris shyǵyndaryn tómendetýge múmkindik berip otyr. Osynyń barlyǵy sýbsıdııalarmen qatar, agrarlyq sektordyń turaqtylyǵyn qamtamasyz etip, ári básekege qabiletin arttyrýǵa yqpal etip otyr,-delingen habarlamada.

Osyǵan deıi AShM 2026 jylǵa astyq eksporty shyǵynyn sýbsıdııalaýǵa 30 mlrd teńge qajet ekeni týraly habarlaǵan bolatyn.