Qazaqstanda sýarý sýyn bólý men esepke alý tsıfrlandyrylmaq
ASTANA. KAZINFORM — Sý resýrstary jáne ırrıgatsııa mınıstrligine qarasty Aqparattyq-taldaý ortalyǵy Sý tutynýdy erte boljaý júıesiniń (STEBJ) bir bóligi sanalatyn «Bıllıng» modýlin ázirledi. Bul týraly vedomstvonyń baspasóz qyzmeti málim etti.
Sý resýrstary jáne ırrıgatsııa mınıstri Nurjan Nurjigitov sýarý sýyn bólý jáne esepke alýdy tsıfrlandyrý máseleleri boıynsha apparat keńesin ótkizdi. Júıe tutynýshylar men «Qazsýshar» RMK arasyndaǵy sý jetkizýge ótinish berý, kelisimshart jasasý jáne esep aıyrysý protsesterin tsıfrlandyrýǵa baǵyttalǵan. Qazirgi tańda STEBJ qajetti sý kólemin kórsete otyryp, elektrondy ótinimder qalyptastyrýǵa, sý kólemin aılar men aýyl sharýashylyǵy daqyldarynyń túrleri boıynsha bólýge, bekitilgen ótinim negizinde kelisimshart jobasyn avtomatty túrde jasaýǵa, ótinimder men kelisimsharttardy ETsQ arqyly qol qoıýǵa múmkindik beredi.
Júıede qarjy operatsııalaryn avtomattandyrýǵa arnalǵan jeke bólim bar. Bankterdiń ekinshi deńgeıdegi júıelerimen ıntegratsııa júrgizilip jatyr, bul shottardy tikeleı bank servısteri arqyly qalyptastyrýǵa jáne tóleýge múmkindik beredi. Sondaı-aq atqarylǵan jumystardyń aı saıynǵy aktilerin avtomatty túrde qalyptastyrý protsesi engizilip jatyr.
Bul qujattarǵa ETsQ arqyly elektrondy formatta qol qoıylady. STEBJ-ti basqa memlekettik aqparattyq júıelermen biriktirý jáne elektrondy qujat aınalymyn qaǵaz túrindegi kelisimsharttarǵa balama retinde zańnamalyq turǵyda bekitý boıynsha da jumys júrip jatyr.
- Júıe qoldanýǵa óte yńǵaıly bolady, sý tutynýdy josparlaý men esepke alýdy dál júrgizýge múmkindik berip, taraptar arasyndaǵy kelisimshart rásimderin jeńildetedi. Bul sheshim qolmen jasalatyn operatsııalardy azaıtyp, derekterdiń dáldigin arttyryp, qujat aınalymyn jyldamdatyp, qarjylyq esep aıyrysýdyń tolyq ashyqtyǵyn qamtamasyz etedi. Qazir Aqparattyq-taldaý ortalyǵynyń mamandary «Qazsýshar» RMK jáne basseın ınspektsııalarymen túsindirý jumystaryn júrgizip jatyr. Barlyq fılıalǵa jáne óndiristik ýchaskelerge júıeni synaqtan ótkizip, úırený úshin qoljetimdilik berildi. Jeltoqsan aıynyń basynan bastap ońtústik óńir mamandaryna kóshpeli oqytý ótkizýdi josparlap otyrmyz, – dedi Sý resýrstary jáne ırrıgatsııa mınıstrligi Tsıfrlandyrý departamentiniń dırektory Meıirgúl Qýandyqova.
Aıta keteıik, Sý resýrstary jáne ırrıgatsııa mınıstrligi Azııa jáne Tynyq muhıty óńirine arnalǵan ekonomıkalyq jáne áleýmettik komıssııamen sý salasyn tsıfrlandyrý boıynsha yntymaqtastyq ornatýǵa nıetti.