Qazaqstanda sýarmaly egister 3,5 mln gektarǵa jetkiziledi
ASTANA. QazAqparat - Búgin Májilistegi Úkimet saǵatynda QR Premer-Mınıstriniń orynbasary-Aýyl sharýashylyǵy mınıstri Ómirzaq Shókeev Qazaqstanda sýarmaly jerler alqaby eleýli túrde artatynyn málim etti, dep habarlaıdy QazAqparat tilshisi.
Atap aıtqanda, Ó. Shókeev 2017-2021 jyldarǵa arnalǵan AÓK-ti damytý baǵdarlamasyna túzetýler engizý taqyrybynda baıandama jasady. Bul oraıda birneshe salalyq baǵdarlamalar qamtylmaq.
Sýarmaly eginshilikti damytý baǵytyna toqtalǵan mınıstr, «qazirgi kezde sýarmaly jerler jalpy egis (21,9 mln gektar) alańynyń 7 paıyzyn ǵana alyp jatyr. Soǵan qaramastan, sýarmaly jerlerden ónim qunynyń 40 paıyzdan astamy alynady. Bul olardyń tıimdi ekenin dáleldeıdi. Bıyldyń ózinde 65 myń gektar sýarmaly egistikti qosamyz. Memlekettik baǵdarlamaǵa sáıkes, sýarmaly jerdiń jalpy alańyn 2021 jylǵa qaraı 2 mln gektarǵa deıin jetkizý kózdelgen», - dedi.
Belgili bolǵandaı, salalyq baǵdarlama aıasynda taǵy 1,5 mln gektar sýarmaly jerdi aınalymǵa qosyp, olardyń alańyn 3,5 mln gektarǵa deıin(2027 jyly) jetkizý josparlanýda. Osylaısha, sýarmaly jerlerdiń úlesi 16 paıyzdy, al ónim kólemi 2,4 trln teńgeni quraıdy. Sýarmaly jerlerden tek kókónis pen jemister ǵana emes, sonymen birge mal azyǵy da alynady.
Budan buryn habarlanǵandaı, Ómirzaq Shókeev fermerlerdiń tuqym alýǵa jumsaǵan shyǵystary óteletinin málim etti.
Sonymen qatar ol fermelerge tehnıkany tıimdi jolmen berý joldaryn atady.
