Qazaqstanda sý únemdeýge arnalǵan TOP-3 tehnologııa
ASTANA.KAZINFORM – Memleket basshysynyń sý únemdeý tehnologııalaryn engizý jónindegi tapsyrmasyn oryndaý aıasynda, memleket sharýalar shyǵynyn óteý kólemin 50%-dan 80%-ǵa deıin ulǵaıtty. Endi memlekettik qoldaý sý alý ınfraqurylymyna, sondaı-aq sýarý júıelerin satyp alý men ornatýǵa jumsalatyn shyǵynnyń bir bóligin óteıdi.
Sý resýrstary jáne ırrıgatsııa mınıstrligi málimetinshe, sońǵy eki jylda qabyldanǵan sharalardyń nátıjesinde sý únemdeý tehnologııalary qoldanylatyn alqap kólemi jyl saıyn shamamen 150 myń gektarǵa artyp otyr.
2025 jyldyń qorytyndysy boıynsha, sý únemdeý tehnologııalary engizilgen alqaptardyń jalpy kólemi 543,5 myń gektar bolǵan.
Egis alqaptaryn lazerlik tegisteý - 62,6 myń ga
Bul tehnologııada egis alqabynyń beti lazerlik jabdyqtyń kómegimen santımetrlik dáldikpen tegisteledi. Sonyń nátıjesinde sý búkil alqapqa birkelki taralady, artyq jınalý men ysyraptyń aldyn alady. Bul ádis ásirese jerústi sýarý kezinde tıimdi jáne Qyzylorda oblysyndaǵy kúrish sharýashylyqtarynda keńinen qoldanylady. Lazerlik tegisteý sý shyǵynyn keminde 20%-ǵa qysqartýǵa múmkindik beredi.
Tamshylatyp sýarý - 165,8 myń ga
Bul tehnologııada sý ósimdiktiń tamyr júıesine tikeleı, naqty mólsherde jetkiziledi. Osylaısha sýarý tıimdiligi aıtarlyqtaı artady. Tamshylatyp sýarý ásirese Túrkistan oblysynda maqta, kókónis jáne baqsha daqyldaryn ósirýde, Almaty jáne Jambyl oblystarynda kartop, kókónis, baqsha jáne kópjyldyq egindi sýarýda keńinen qoldanylady. Bul ádis sýarý sýyn shamamen 30%-ǵa deıin únemdeýge, al ónimdilikti 1,5-2 esege deıin arttyrýǵa múmkindik beredi.
Jańbyrlatyp sýarý - 315,1 myń ga
Bul - Qazaqstanda eń keń taralǵan sýarý tásili. Munda sý qysym arqyly qubyr júıesimen berilip, alqap ústine shashyratylady. Sonyń arqasynda egistik birkelki ylǵaldandyrylady. Bul tehnologııa Aqmola oblysynda, Soltústik Qazaqstan oblysynda, Qostanaı oblysynda jáne Pavlodar oblysynda keńinen qoldanylady. Ol negizinen júgeri, dándi daqyldar, mal azyǵy daqyldaryn sýarý úshin paıdalanylady. Soltústik óńirlerde jańbyrlatyp sýarý júıeleri mal azyǵy daqyldaryn sýarýda belsendi qoldanylyp, mal sharýashylyǵy úshin jem-shóp bazasyn birneshe ese arttyrýǵa múmkindik berip otyr.
Aıta keteıik, Qazaqstanda sýǵa uqypty qaraý mádenıeti kúsheıtilip jatyr.
