Qazaqstanda sý únemdeý tehnologııalaryn óndiretin zaýyttar sany jetige jetti
ASTANA. KAZINFORM — Qazaqstanda sý únemdeý jabdyqtaryn shyǵaratyn otandyq zaýyttar sany 2024 jylǵy tórtten jetige deıin ósti. Bıyl zamanaýı sýarý júıeleri taǵy 158 myń gektar alqapqa engizildi. Nátıjesinde olardyń jalpy kólemi 702,3 myń gektarǵa jetti. Bul týraly Sý resýrstary jáne ırrıgatsııa mınıstrligi málim etti.
Mınıstrliktiń málimetinshe, Qazaqstanda sharýalardyń sý únemdeıtin jabdyqtarǵa degen qajettiligin qamtamasyz etý maqsatynda jańbyrlatyp sýarý mashınalary men tamshylatyp sýarý jabdyqtaryn jasaıtyn jeti otandyq zaýyt jumys isteıdi. Onyń úsheýi Túrkistan oblysynda, ekeýi Astana qalasynda, bir-birden Atyraý oblysy men Almaty qalasynda ornalasqan. 2025 jyly elde bes zaýyt jumys istese, 2024 jyly olardyń sany tórt bolǵan.
Qoldanystaǵy kásiporyndardyń jalpy óndiristik qýaty jylyna 3 390 jańbyrlatyp sýarý mashınasyn shyǵarýǵa jetedi. Bul shamamen 205 myń gektar jerdi sýarýǵa múmkindik beredi. Jedel málimetterge sáıkes, bıyl aýyl sharýashylyǵy taýaryn óndirýshiler jalpy 82,5 myń gektar jerdi sýarýǵa arnalǵan shamamen 1 010 jańbyrlatyp sýarý mashınasyn satyp alǵan.
Sonymen qatar sheteldik ınvestıtsııa tartý baǵytynda da belsendi jumys júrgizilip jatyr. Máselen, Qostanaı oblysynda amerıkalyq jańbyrlatyp sýarý mashınalaryn jergilikti jerde óndirý jobasy iske qosyldy. Osyndaı joba Qaraǵandy oblysynda da júzege asyrylyp jatyr.
— Bıyl jyl basynan beri sý únemdeý tehnologııalary qosymsha 158 myń gektar sýarmaly jerge engizildi. Nátıjesinde zamanaýı sýarý júıeleri qoldanylatyn alqaptardyń jalpy kólemi shamamen 702,3 myń gektarǵa jetti. Sondaı-aq sýarý sýyn sýbsıdııalaý qaǵıdalaryna ózgerister engizildi. Atap aıtqanda, sýbsıdııalanatyn sý únemdeý tehnologııalarynyń tizbesine lazerlik tegistegish qosyldy, — dedi Sý resýrstary jáne ırrıgatsııa vıtse-mınıstri Talǵat Momyshev.
Eske salaıyq, Sý resýrstary jáne ırrıgatsııa mınıstrligi aýyl sharýashylyǵy taýaryn óndirýshilerdiń sý únemdeý júıelerin satyp alý jáne ornatý shyǵyndarynyń óteletin úlesin 50%-dan 80%-ǵa deıin ulǵaıtty. Al mundaı júıelerdi paıdalanǵan jaǵdaıda sýarý sýyna beriletin sýbsıdııa mólsheri 85%-ǵa deıin arttyryldy.
