Qazaqstanda sý tutyný kólemin erte boljaý júıesi ázirlenip jatyr
ASTANA. KAZINFORM – Sý resýrstary jáne ırrıgatsııa mınıstrliginiń «Sý resýrstarynyń aqparattyq-taldaý ortalyǵy» KEAQ sý tutyný kólemin erte boljaý júıesin ázirlep jatyr.
Joba aıasynda Qazaqstannyń ońtústigindegi ırrıgatsııa ınfraqurylymyna qatysty biryńǵaı derekter bazasy jasalady. Sondaı-aq sýarmaly jerlerdiń naqty shekarasy anyqtalyp, aýyl sharýashylyǵy alqaptarynyń jaǵdaıyn baqylaý úshin jerdi qashyqtan zondtaý tehnologııalary qoldanylady.
Mınıstrlik málimetinshe, jańa júıe sý paıdalanýǵa qatysty negizgi protsesterdi tsıfrlandyrýdy kózdeıdi. Atap aıtqanda, sý alýǵa ótinish berý, kelisimshart jasaý jáne sý tutynýdy esepke alý sııaqty qyzmetter elektrondy formatqa kóshiriledi.
Sonymen qatar júıe ǵaryshtyq monıtorıngtiń kómegimen sýdy zańsyz paıdalaný jáne aýyl sharýashylyǵy jerlerin ruqsatsyz sýarý faktilerin anyqtaýǵa múmkindik beredi.
– Bul joba sý resýrstaryn bólýdiń ashyqtyǵyn arttyrýǵa, sýarmaly sýdy paıdalaný baqylaýyn kúsheıtýge jáne aýyl sharýashylyǵynda sý resýrstaryn basqarýdyń zamanaýı tsıfrlyq quraldaryn engizýge baǵyttalǵan, – dedi «Sý resýrstarynyń aqparattyq-taldaý ortalyǵy» KEAQ basqarma tóraǵasy Qaıratǵalı Haırýlla.
Aıta keteıik, Qyzylorda oblysyndaǵy sý salasynyń ókilderi Syrdarııa ózenindegi sý deńgeıi jáne kóktemgi sý tasqynyna daıyndyq týraly aıtyp berdi.
