Qazaqstanda sý tasqynyn boljaý jáne aldyn alý sharalary kúsheıtiledi

ASTANA. KAZINFORM - Jańa Sý kodeksi jáne basqa da birqatar strategııalyq memlekettik baǵdarlamalar sý tasqynyn boljaý jáne aldyn alý jónindegi sharalardy kúsheıtý maqsatynda qaıta qaralady.

Bul týraly vıtse-premer Qanat Bozymbaevtyń tóraǵalyǵymen ótken keńeste belgili boldy.

Qazaqstanda birneshe tıisti IT-sheshimder jasalmaq: jedel habarlaý jáne qutqarý qyzmetterin TJ aımaǵyna jóneltý úshin SKYMAX sý tasqynynyń aldyn alý júıesi jáne tasqyn sýlardyń ótýiniń tsıfrlyq karta-shemasy.

Sonymen qatar sý qorǵaý aımaqtarynda jer ýchaskeleriniń bólinýin baqylaý úshin sý obektileri men kadastr boıynsha derekterdi qamtıtyn hydro.gov.kz platformasy ázirlenýde. Ákimdikter sý qorǵaý aımaqtarynda ornalasqan qurylystarǵa tekserý júrgizip, olardy joıý nemese kóshirýdi qamtamasyz etýi qajet.

Osy rette Qanat Bozymbaev jergilikti atqarýshy organdarǵa sý qorǵaý aımaqtary men beldeýleri belgilenbegen sý obektisiniń jaǵalaý aımaǵynan 500 metr aıasynda jer ýchaskelerin berýge jol bermeýdi tapsyrdy.

Tıimdi gıdromonıtorıng úshin elimizde gıdroposttar sany artady. Qoldanystaǵy 377 gıdropostqa taǵy jańa 139 nysan qosylady, olar sý tasqyny qaýpi bar aýmaqtar men transshekaralyq ózenderde ornatylady.

«Qazgıdromet» RMK janyndaǵy gıdrologııalyq qyzmetti Prezıdent tapsyrmasy boıynsha jańadan qurylǵan «Qazgıdrogeologııa» ulttyq gıdrogeologııalyq qyzmetine tapsyrý usynyldy. Qazirgi ýaqytta bul másele talqylaý satysynda.

Sý tasqynyn boljaý úshin halyqaralyq saraptamalyq qoldaý mańyzdy. Apattyń alǵashqy kúnderinen bastap elimizde Nıderlandydan kelgen ǵalymdar toby jumys istep jatyr, olar jaqyn arada sý tasqyny qaýpin basqarýdyń birlesken josparyn usynady.

Keńes barysynda vıtse-premer ákimdikterdiń gıdroqurylystardy paıdalanýdyń mamandandyrylǵan uıymdaryn qurý týraly baıandamalaryn tyńdap, beıindi mınıstrlikterge birqatar tapsyrmalar berdi.