Qazaqstanda sý tapshylyǵy 20 paıyzdy quraıdy - N. Qapparov
ASTANA. 11 maýsym. QazAqparat - Qazirgi tańda qazaqstandaǵy sý tapshylyǵy 20 paıyzdy quraıdy. Búgin QR Parlamenti Májilisinde ótken Úkimet saǵatynda Qorshaǵan ortany qorǵaý mınıstri Nurlan Qapparov osylaı málim etti.
Óz baıandamasynda qorshaǵan ortany qorǵaý vedomstvosynyń basshysy Qazaqstan ekologııasynyń ózekti máselelerine toqtala kele, onyń ishindegi elimizdiń tabıǵı áleýetiniń jutańdanýymen baılanysty problemalarǵa nazar aýdartty.
«Jerdiń qunarlylyǵy, sý jáne bıologııalyq resýrstar qysqarýda, orman, taý jáne basqa ekojúıeler budan ári azyp-tozý ústinde. Tuşy sý tapshylyǵy búkil álemde qarqyndap ósýde. Ásirese, halyq sanynyń ósýine, sýdyń basqa arnaǵa burylýyna, sondaı-aq muzdyqtardyń erýine, qurǵaqshylyqqa, jerdiń azyp-tozý úderisiniń artýyna baılanysty Ortalyq Azııa elderinde sýmen qamsyzdandyrý ózekti problemaǵa aınalýda. Al elimizge keletin bolsaq, qazirgi tańda Qazaqstanda sý tapshylyǵy 20 paıyzdy quraıdy. Budan ári tutynýdyń artýyna jáne klımat ózgerýine baılanysty sý tapshylyǵy tek arta túspek», - deıdi mınıstr.
N. Qapparovtyń aıtýynsha, transshekaralyq aǵysqa joǵary táýeldilik, gıdromelıoratıvtik júıeniń eskirýi jáne aýyl sharýashylyǵy óndirisi qurylymynyń turaqsyzdyǵy Qazaqstannyń ońtústik aımaqtaryn sýmen qamsyzdandyrý perspektıvasyna úlken kúmán týdyrady.
«Qazirgi tańda Qazaqstanda sýǵarmaly sý ónimdiligi bir tekshe metr sýǵa 0,4 - 0,8 kg ónim bolsa, ol damyǵan elderde 2,5 - 8 kg quraıdy. Sý men jerdiń ónimdiligin, sondaı-aq ónimniń sapasy men onyń qunyn arttyrý tetikteriniń biri organıkalyq aýyl sharýashylyǵyn damytý bolyp tabylady. Budan bólek, Qazaqstanda otarlyq mal sharýashylyǵyn qalpyna keltirý jáne damytý úshin barlyq múmkindikter bar. Buryn qoljetimsiz bolǵan jańartylatyn energııa kózderin qoldaný fermerlerge ózin energııamen jáne sýmen qamsyzdandyrýǵa múmkindik beredi. Bul tozǵan jerlerdiń jaǵdaıyn eleýli jaqsartýǵa jáne paıdalanylmaǵan jaıylymdardyń úlken aýmaǵyn qalpyna keltirýge jáne mal basynyń kóbeıýine múmkindik beredi», - deıdi N. Qapparov.
