Qazaqstanda sý salasyn jańǵyrtýǵa 1 trln teńgege jýyq ınvestıtsııa tartyldy
ASTANA.KAZINFORM – 2023 jylǵy qyrkúıekten beri Qazaqstannyń sý salasynyń negizgi kapıtalyna shamamen 1 trln teńge ınvestıtsııa tartyldy. Bul týraly Úkimet otyrysynda Sý resýrstary jáne ırrıgatsııa mınıstri Nurjan Nurjigitov málimdedi.
Mınıstrdiń aıtýynsha, Memleket basshysynyń tapsyrmalaryn oryndaý aıasynda sý salasyn reformalaý jáne sý resýrstaryn tıimdi paıdalaný baǵytynda júıeli jumys júrgizilip jatyr.
– Osy baǵyttaǵy mańyzdy nátıjelerdiń biri – jańa Sý kodeksiniń qabyldanýy. Kodekste sý resýrstaryn utymdy paıdalaný, sýdy únemdeý, sý obektilerin qorǵaý jáne sý qaýipsizdigin qamtamasyz etý qaǵıdattary bekitildi, – dedi Nurjan Nurjigitov.
Onyń sózinshe, sýdy tıimdi paıdalaný, ysyrapty azaıtý jáne sý paıdalaný talaptaryn saqtaý jónindegi zańnamalyq talaptar kúsheıtilgen. Jyl basynan beri sýdy paıdalaný salasynda 758 zańbuzýshylyq anyqtalǵan. Bul ótken jylǵy kórsetkishten eki eseden astam kóp. Sonymen qatar avtokólik jýý oryndarynda tehnologııalyq maqsattarǵa ortalyqtandyrylǵan aýyzsýdy paıdalanýdy shekteý boıynsha Sý kodeksine túzetýler ázirlengen.
Mınıstrdiń málimetinshe, sońǵy eki jylda 1,4 myń shaqyrymnan astam kanal, bes sý qoımasy jáne segiz gıdrotehnıkalyq qurylys rekonstrýktsııalanǵan.
– Qazirgi ýaqytta 4,6 myń shaqyrymnan astam ırrıgatsııalyq jeli jańǵyrtylýda. Bıyl onyń 964 shaqyrymyn aıaqtaý josparlanǵan. Nátıjesinde 200 myń gektarǵa jýyq sýarmaly jerdiń sýmen qamtamasyz etilýi jaqsarady, – dedi vedomstvo basshysy.
Sondaı-aq halyqaralyq qarjy uıymdarynyń qoldaýymen sý sharýashylyǵy nysandaryn salý jáne jańǵyrtý jobalary iske asyrylyp jatyr. Qoldanystaǵy jáne tartylyp jatqan qarajattyń jalpy kólemi shamamen 2,2 trln teńgeni quraıdy.
Bul baǵytta Eýropalyq qaıta qurý jáne damý banki, Islam damý banki jáne Dúnıejúzilik bankpen birlesip, jańa jobalar ázirlenip jatyr. Nurjan Nurjigitov sýdy únemdeý tehnologııalaryn engizý salanyń negizgi basymdyqtarynyń biri ekenin atap ótti.
– Elimizde alynatyn sýdyń shamamen 60 paıyzy aýyl sharýashylyǵyna tıesili. Sondyqtan negizgi nazar sý únemdeý tehnologııalaryn engizýge aýdarylǵan. Búginde bul tehnologııalar qoldanylatyn alqap 702 myń gektarǵa jetti. Sonyń nátıjesinde shamamen 1,1 mlrd tekshe metr sý únemdeldi, – dedi mınıstr.
Ónerkásip salasynda aınalymdy jáne qaıta sýmen jabdyqtaý júıelerine kezeń-kezeńimen kóshý kózdelgen. 2030 jylǵa qaraı sýdy qaıta paıdalaný úlesin 28 paıyzǵa jetkizý josparlanyp otyr.
Al kommýnaldyq-turmystyq sektorda jyl saıyn qosymsha 260 mln tekshe metrge deıin sý únemdeýge múmkindik bar.
Aıta keteıik, 2030 jylǵa qaraı sý únemdeý tehnologııalary qoldanylatyn alqaptar 1,3 mln gektar bolady.
