Qazaqstanda Sý resýrstarynyń ulttyq aqparattyq júıesi iske qosyldy
ASTANA. KAZINFORM - Sý resýrstary jáne ırrıgatsııa mınıstrliginiń «Sý resýrstarynyń aqparattyq-taldaý ortalyǵy» KEAQ ázirlegen Sý resýrstarynyń ulttyq aqparattyq júıesi (SRUAJ) ónerkásiptik paıdalanýǵa berildi, dep habarlaıdy mınıstrliktiń baspasóz qyzmeti.
Sý resýrstary jáne ırrıgatsııa mınıstri Nurjan Nurjigitov salany tsıfrlandyrý máseleleri boıynsha apparat keńesinde atap ótkenindeı, aqparattyq júıe Memleket basshysynyń tapsyrmasyn iske asyrý aıasynda ázirlendi. Ol sý nysandary, sý sharýashylyǵy ınfraqurylymy, sý paıdalanýshylar, jerasty sýy jáne salanyń basqa da elementteri týraly derekterdi biriktiredi.
Júıeniń negizgi maqsaty – basqarýshylyq sheshimder qabyldaý úshin biryńǵaı, senimdi ári ózekti derekter bazasyn qalyptastyrýdy qamtamasyz etý.
Búginde Sý resýrstarynyń ulttyq aqparattyq júıesinde 23 myńnan astam sý nysany týraly derekter tsıfrlandyrylyp, júıelendi. Onyń ishinde 17 758 ózen, 3 148 kól jáne 1 207 gıdrotehnıkalyq nysan bar.
Sonymen qatar júıede shamamen 3 myń uıym men 4 myńnan astam paıdalanýshy tirkelgen. Sý sharýashylyǵy jáne gıdrotehnıkalyq nysandardyń 9 myńǵa jýyq tsıfrlyq pasporty engizildi.
Sondaı-aq 2,2 myńnan astam bastapqy sý esebi jónindegi esep pen 1,3 myńnan astam 2-TP nysanyndaǵy esep qabyldandy.
-Sý resýrstarynyń ulttyq aqparattyq júıesiniń fýnktsıonaly sý balansyn júrgizýdi, sý paıdalanýdy esepke alý men taldaýdy, sý qoımalarynyń jaı-kúıin monıtorıngteýdi, transshekaralyq sý nysandary jónindegi derektermen jumys isteýdi, sondaı-aq ǵaryshtyq monıtorıngti qamtıdy. SRUAJ-dy engizý ekonomıkanyń turaqty damýy men elimizdiń sý qaýipsizdigin qamtamasyz etý úshin sý resýrstaryn basqarýdyń keshendi, kópdeńgeıli júıesin qalyptastyrýǵa múmkindik beredi, – dedi Sý resýrstary jáne ırrıgatsııa mınıstri Nurjan Nurjigitov.
Mınıstrlik sondaı-aq kanaldar arqyly sý berý boıynsha tutynýshylarmen elektrondy kelisimsharttar jasasýdy, onlaın tólem júrgizýdi jáne sý resýrstaryn avtomattandyrylǵan esepteýdi kózdeıtin Sý tutynýdy erte boljaý júıesin tájirıbelik paıdalanýǵa berdi.
Búginde kelisimshart jasasý protsesi tolyqtaı elektrondy formatqa kóshirildi. Jyl basynan beri sharýalarmen 29 myńnan astam kelisim jasaldy.
Osyǵan deıin qoqıqazdardyń mekenin saqtaý úshin Qorǵaljynǵa 40 mln tekshe metr sý jiberilgeni týraly jazdyq.
