Qazaqstanda sý resýrstaryn qorǵaýǵa volonterler tartylady
ASTANA. KAZINFORM — Qazaqstanda sý resýrstaryn qorǵaý jáne únemdeý jumystaryna volonterlerdi tartý kózdelip otyr. Osy maqsatta Sý resýrstary jáne ırrıgatsııa mınıstrligi Ulttyq volonterlik jelimen yntymaqtastyq týraly memorandýmǵa qol qoıdy. Bul týraly vedomstvonyń baspasóz qyzmeti málim etti.
Qujatqa Sý resýrstary jáne ırrıgatsııa vıtse-mınıstri Talǵat Momyshev pen «Ulttyq volonterlik jeli» zańdy tulǵalar birlestiginiń atqarýshy dırektory Tatıana Mıronıýk qol qoıdy.
Memorandýmnyń negizgi maqsaty — sý nysandaryn saqtaý, ekologııalyq volonterlikti damytý jáne halyq arasynda sýǵa uqypty qaraý mádenıetin qalyptastyrý baǵytynda kúsh biriktirý. Yntymaqtastyq aıasynda taraptar sý resýrstaryn qorǵaýǵa, azamattardyń ekologııalyq jaýapkershiligin arttyrýǵa jáne sý únemdeý qaǵıdattaryn keńinen nasıhattaýǵa baǵyttalǵan birlesken jobalar men is-sharalardy júzege asyrýdy josparlap otyr.
Qazaqstan óńirlerinde volonterlik bastamalardy damytýǵa, ekologııalyq aktsııalar, bilim berý semınarlary men trenıngter uıymdastyrýǵa, sondaı-aq volonterlik salasyndaǵy ozyq tájirıbelerdi taratýǵa erekshe nazar aýdarylady. Budan bólek, memorandým aıasynda tájirıbe almasý, sý resýrstaryn utymdy paıdalaný qajettiligi týraly qoǵamnyń habardarlyǵyn arttyrýǵa baǵyttalǵan birlesken is-sharalarǵa uıymdastyrýshylyq jáne aqparattyq qoldaý kórsetý kózdelgen.
— Buǵan deıin Sý resýrstary jáne ırrıgatsııa mınıstrliginiń bastamasymen sý salasyndaǵy alǵashqy volonterlik qozǵalys — «Bolashaqtyń qaınary» qurylǵan bolatyn. Onyń quramyna Taraz qalasyndaǵy Qazaq ulttyq sý sharýashylyǵy jáne ırrıgatsııa ýnıversıtetiniń stýdentteri endi. Qozǵalys músheleri Memleket basshysynyń «Taza Qazaqstan» jalpyulttyq bastamasy aıasynda uıymdastyrylǵan «Móldir bulaq» ekologııalyq aktsııasyna qatysyp úlgerdi. Aktsııa aıasynda bulaqtardy tazartý jáne qalpyna keltirý, olarǵa irgeles aýmaqtardy abattandyrý, qoqystardy jınaý jáne kóshet otyrǵyzý jumystary júrgizildi. «Bolashaqtyń qaınary» qozǵalysynyń volonterleri ekologııalyq is-sharalarǵa qatysýmen qatar, sý únemdeý mádenıetin nasıhattaýdy jáne halyq arasynda ekologııalyq mádenıetti qalyptastyrýdy da maqsat etip otyr. Ulttyq volonterlik jelimen memorandýmǵa qol qoıý — mınıstrliktiń ekologııalyq volonterlikti damytý baǵytyndaǵy júıeli jumysynyń jalǵasy. Bul qujat Qazaqstannyń sý resýrstaryn saqtaýǵa baǵyttalǵan bastamalarǵa qoǵam ókilderiniń qatysý aıasyn keńeıtýge múmkindik beredi, — dedi Sý resýrstary jáne ırrıgatsııa vıtse-mınıstri Talǵat Momyshev.
