Qazaqstanda sý qustarynyń sanaǵy júrgizilip jatyr
NUR-SULTAN. QazAqparat – Qazaqstannyń bıoártúrliligin saqtaý qaýymdastyǵy (QBSA) Halyqaralyq sýda júzetin jáne sý mańynda meken etetin qustardy tirkeý esebine (International Waterbird Census) qosylyp, elimizdegi sý qustarynyń sanaǵyn júrgizip jatyr, dep habarlaıdy QazAqparat tilshisi.
Halyqaralyq esep bir mezette álemniń 100 elinde júrgiziledi.
«Birinshi bolyp QBSA klýbynyń músheleri qustardyń esebin júrgizýge Aqtaý qalasyna attandy. Mańǵystaý oblysynda negizgi ornıtologııalyq aýmaqtardyń biri – Qarakól ornalasqan. Oqýshylar ol jerden myńdaǵan qustyń baryn anyqtaǵan. Onyń ishinde qoqıqaz da bar», - delingen QBSA-nyń Facebook-tegi paraqshasynda.
Sonymen birge, klýb músheleri Nur-Sultan men Almaty qalalarynda, Shyǵys Qazaqstan men Túrkistan oblystarynda meken etetin qustardy sanaýda.
«Qatarymyzǵa qosylýǵa nıetti kez kelgen azamat halyqaralyq sharaǵa atsalysyp, ózine jaqyn mańdaǵy sý aıdyndaryndaǵy qustardyń sanaǵyn júrgize alady», - delingen habarlamada.
