Qazaqstanda sý ınfraqurylymyn damytýǵa 192,6 mlrd teńge baǵyttaldy
ASTANA. KAZINFORM — 2026 jyldyń toǵyz aıynda Qazaqstannyń sý salasyna 192,6 mlrd teńge ınvestıtsııa tartyldy, dep habarlaıdy Sý resýrstary jáne ırrıgatsııa mınıstrliginiń baspasóz qyzmeti.
2026 jyldyń toǵyz aıynda Qazaqstannyń sý salasynyń negizgi kapıtalyna 192,6 mlrd teńge ınvestıtsııa tartyldy. Osylaısha, 2023 jylǵy qyrkúıekte Sý resýrstary jáne ırrıgatsııa mınıstrligi qurylǵannan beri salanyń negizgi kapıtalyna salynǵan ınvestıtsııalardyń jalpy kólemi 970,8 mlrd teńgege jetti.
Eske sala keteıik, 2024-2025 jyldary sý salasynyń negizgi kapıtalyna tartylǵan ınvestıtsııa kólemi 676,7 mlrd teńgeni qurady. Bul aldyńǵy eki jyldaǵy kórsetkishpen salystyrǵanda 79%-ǵa joǵary. Tartylǵan ınvestıtsııalar esebinen júzege asyrylyp jatqan jobalardyń qatarynda Islam damý bankimen birlesip Jambyl, Batys Qazaqstan jáne Qyzylorda oblystarynda úsh sý qoımasyn salý, Azııa damý bankiniń qoldaýymen Aqmola oblysynda Esil kontrrettegishin salý jáne basqa da aýqymdy jobalar bar.
— Salaǵa tartylyp jatqan qarajat, eń aldymen, sý sharýashylyǵy ınfraqurylymyn salýǵa jáne jańǵyrtýǵa baǵyttalady. Bul rette halyq pen ekonomıka salalaryn turaqty sýmen qamtamasyz etýge tikeleı áser etetin sý qoımalary, kanaldar, gıdrotehnıkalyq qurylystar jáne basqa da nysandar týraly sóz bolyp otyr. Túptep kelgende, ınvestıtsııalar sýmen jabdyqtaý senimdiligin arttyrýǵa, sý shyǵynyn azaıtýǵa jáne sý resýrstaryn basqarý tıimdiligin jaqsartýǵa múmkindik berýi tıis. Sonymen qatar halyqaralyq yntymaqtastyq qarjylyq qoldaýmen ǵana shektelmeıdi. Ol zamanaýı tehnologııalardy engizýdi, salany tsıfrlandyrýdy, kadrlyq jáne ǵylymı áleýetti nyǵaıtýdy, sondaı-aq ozyq tájirıbe almasýdy da kózdeıdi, — dedi Sý resýrstary jáne ırrıgatsııa mınıstri Nurjan Nurjigitov.
Buǵan deıin Qazaqstan Ortalyq Azııada sheteldik ınvestıtsııalardy eń kóp tartqan el atanǵanyn jazdyq.
