Qazaqstanda sý esepteý qurylǵylaryn paıdalaný erejeleri jańardy

ASTANA. KAZINFORM — Sý jabdyqtaý jáne sý tógimdi júıelerindegi sý esepteý qurylǵylaryn tańdaý, ornatý jáne paıdalaný jónindegi jańa erejelerdi ónerkásip jáne qurylys mınıstri óziniń buıryǵymen bekitti.

Qujat eseptegishterdi ornatý jáne paıdalaný tártibin, olardyń metrologııalyq tekserisine jáne aýystyrýyna qoıylatyn talaptardy, sondaı-aq sý alý jáne sý tógetin qurylystardaǵy, nasos stantsııalaryndaǵy jáne sońǵy tutynýshylardaǵy sý esepteý toraptarynyń mınımaldy jabdyqtalý deńgeıin anyqtaıdy.

Erejelerge «avtomattandyrý», «aqparattandyrý obektileri», «qashyqtan derekter jınaý jáne berý» jáne «derekter jınaý jáne berý qurylǵysy (DSBQ)» sııaqty termınder engizildi.

Sý esepteý toraptary sý jabdyqtaý júıeleriniń árbir kirisinde – turǵyn jáne turmystyq emes ǵımarattarda ornatylýy tıis. Kóppáterli úılerde jalpy turǵyn úıdiń sý eseptegishi engizilip, jalpy tutyný kólemi tirkeledi.

Tekserý jáne aýystyrý:

• Eseptegishter memlekettik ólsheý quraldary reestrine engizilip, tekserý móri men sertıfıkaty bolýy tıis.

• Mejtekserý aralyǵy aıaqtalǵan soń qural kommertsııalyq esepten alynyp, esepteýlerde qoldanylmaıdy.

• Qural isten shyqqan jaǵdaıda qyzmet kólemi úsh aldyńǵy aıdyń ortasha tutynýy boıynsha ýaqytsha anyqtalady, biraq bir aıdan aspaıdy. Quraldy aýystyrý 30 kún ishinde júrgizilýi qajet.

Móri buzylǵan, tekserý merzimi ótken nemese reestrde tirkelmegen eseptegishterdi paıdalanýǵa tyıym salynady. Aqaýlar nemese urlyq anyqtalǵan jaǵdaıda jaýapkershilik sý tutynýshyǵa júkteledi.

Esepteý quraldaryn paıdalaný jáne saqtaýǵa jaýapty tulǵalar:

• Qurylysshy – nysandy menshikke tapsyrýǵa deıin;

• Zańdy tulǵa nemese turǵyn úı ıesi – nysan paıdalanýǵa berilgennen keıin;

• Kóppáterli úılerde – kondomınıým basqarý organy nemese onyń bolmaýynda turǵyndar.

Buǵan deıin elimizde sý tarıfin esepteý júıesin tolyq tsıfrlandyrý josparlanyp otyrǵanyn jazǵan edik.