Qazaqstanda sý basý qaýpi bar 445 jol ýchaskesi bar

ORAL. QazAqparat – Elimizde 3-4 naýryzda ótken «Kóktem – 2022» respýblıkalyq komandalyq-shtabtyq oqý-jattyǵý jıyny qorytyndylandy, dep habarlaıdy QazAqparat tilshisi.

Bıyl respýblıkalyq shtab Oral qalasynda ornalasyp, oqý-jattyǵý QR Tótenshe jaǵdaılar vıtse-mınıstri Marat Kúldikovtiń basshylyǵymen ótti.

QR TJM baspasóz qyzmetinen málim etkenindeı, kóktemgi sý tasqyny kezinde jedel qımyldaý úshin 10 myń adam men 1 700 tehnıkadan turatyn azamattyq qorǵaý organdarynyń arnaıy toptary quryldy.

Oqý-jattyǵý bolǵan 3-4 naýryz kúnderi respýblıka boıynsha eldi mekenderden 1,5 mln tekshe metrden astam qar shyǵaryldy.

Qazirgi ýaqytta qar shyǵarý jumystary jalǵasýda. Halyqtyń áleýmettik osal toptaryna jatatyn 1 myńnan astam otbasyna úı mańyn qardan jáne shatyrlardy muzdan tazartý baǵytynda kómek kórsetildi.

Sondaı-aq kóktemgi sý tasqynyna daıyndyq aıasynda 9 myńnan astam aryqtar men kanaldar, 10 myńnan astam sý ótkizetin qurylymdar tazartyldy.

Uzyndyǵy 43 myń metr bógender jóndelip, 39 myń metr qashyqtyqta jaǵalaýdy bekitý jumystary atqaryldy. 25,5 myń tonna kóleminde janar-jaǵar maı qory, 300 myń tonnadan astam ınertti materıaldar, 900 myń danadan astam qap ázirlendi.

Tasqyn kezinde evakýatsııalanýy múmkin turǵyndardy qabyldaıtyn 3 myńnan astam pýnkt anyqtaldy.

«Budan basqa óńirlerde sý tasqyny kúrdelengen jaǵdaıda Atyraý, Qaraǵandy, Jambyl, Mańǵystaý oblystary men Nur-Sultan, Almaty, Shymkent qalalarynan, respýblıkalyq jedel qutqarý jasaǵy jáne TJM áskerı bólimderinen arnaıy kúsh-quraldar, sondaı-aq «Qazavıaqutqarý» AQ áýe kemeleri jedel jiberiletin bolady. Ómirlik mańyzy zor nysandarda apatty jaǵdaı týyndaǵan kezde elektr jaryǵymen qamtı alatyn 600-den astam avtonomdy qýat kózi ázirlendi. Otyn qoımalarynda 2 mln astam tonna kómir, 115 myńdaı tonna mazýt bar. Inertti materıaly bar 30 myńnan astam qap daıyndaldy. Meteorologııalyq baqylaý júrgizýge 341 meteosantsııa saqadaı saı. 50 myń tonnadan astam ınertti materıaldar men 3 myń tonna janar-jaǵar maıdyń apattyq qory jasaldy. Respýblıkalyq mańyzy bar avtojoldarda uzyndyǵy 261 km bolatyn 445 sý basý qaýpi bar ýchaske anyqtaldy. Sol sekildi sý basýy múmkin 673 temir jol ýchaskesi belgili boldy. Sanavıatsııa jelisi boıynsha 33 áýe kemesi ázir tur. Oqý-jattyǵýdyń qorytyndysy boıynsha jergilikti atqarýshy organdarǵa eldi mekenderdi, avtomobıl jáne temir joldardy, ómirlik mańyzy zor nysandardy tasqyn sýdan qorǵaý baǵytynda qajetti sharalardy qabyldaý usynyldy», - dep habarlady vedomstvodan.

Eske sala keteıik, budan buryn Batys Qazaqstanda 49 eldi mekendi sý basý qaýpi bar ekendigin jazǵan bolatynbyz.