Qazaqstanda sý astynda qalǵan úıler sany 3 412-ge jetti
ASTANA. KAZINFORM – Ortalyq kommýnıkatsııalar qyzmetinde ótken brıfıngide Tótenshe jaǵdaılar mınıstrligi azamattyq qorǵanys jáne áskerı bólimder komıtetiniń aǵa ofıtseri Erasyl Saıpash sý alǵan úılerdiń sanyn atady.
Sý tasqyny bastalǵannan beri azamattyq qorǵanys qyzmetteri 76 myńǵa jýyq adamdy, onyń ishinde 30 myńǵa jýyq balany jáne 45 múmkindigi shekteýli azamatty qaýipsiz orynǵa jetkizdi.
«Ýaqytsha panalaý beketterinde 7 703 adam, onyń ishinde 3 266 bala ornalastyryldy. Tótenshe jaǵdaılar, Qorǵanys mınıstrligi men Ulttyq ulannyń áýe kemeleri qutqarý jumysyn áli júrgizip jatyr. 7 mln 828 myńnan astam tekshe metr erigen qar sýy soryp shyǵaryldy. 1090-nan astam qumqap pen 996,1 myńnan astam tonna ınertti materıal tóseldi», — dedi komıtet ókili.
Erasyl Saıpashtyń málimeti boıynsha, tasqynnan qutqarý jumystaryna 16 myńǵa jýyq adam, 3 myńǵa jýyq tehnıka, 6 áýe kemesi jumyldyrylǵan.
«Osy saǵatta Atyraý, Aqtóbe, Aqmola, Qostanaı, Batys Qazaqstan, Soltústik Qazaqstan jáne Pavlodar oblystarynda 3 412 jeke turǵyn úı, 421 aýla jáne 1926 saıajaı úıi sý astynda qalyp otyr», — dedi TJM ofıtseri.
