Qazaqstanda stýdentterge ata-anasynyń ruqsatynsyz nesıe bermeý usynyldy
«Biz qazir stýdenttermen tyǵyz qarym-qatynas ornatýǵa tyrysamyz. Buryn jastar ishpese, shekpese dep qorqatyn edik. Qazir basqa problema. Búginde barlyq stýdentte derlik nesıe bar. Ol týraly ata-analary bilmeıdi. Ata-anasy bilip qoıǵannan keıin ekijaqty problema bastalady. Sosyn ol stýdent nesıemdi jabamyn dep, taǵy nesıe alyp nemese qaryz alyp jatady. Qaryzdan qutylý úshin býkmekerlik mekemelerge bás tigip nemese lombardqa jeke zattaryn ótkizip jatady. Ózimen qoımaı, dostarynyń senimine kirip, olarǵa da nesıe aldyrǵan jaıttar bar. Biz bul máseleni mınıstrdiń aldynda qozǵadyq. Osy oraıda stýdent degen mártebesi bar jastarǵa ata-anasynyń ruqsatynsyz nesıe bermeý týraly zań qabyldap nemese sheshim shyǵarýdyń múmkindigi bar ma?» - dedi L. Gýmılev atyndaǵy Eýrazııa ulttyq ýnıversıtetindegi jastar departamentiniń dırektory Jambyl Tilepov.
Atalǵan saýalǵa qatysty QR Parlamenti Senatynyń depýtaty Nurlan Beknazarov pikir bildirdi.
«Byltyr elimizde nesıe berý boıynsha bankterdiń talaby qatańdatyldy. Bul baǵytta jumys júrip jatyr. Bul máseleniń ekinshi jaǵy bar. Eger nesıe berýdi múldem qatańdatyp tastasaq, orta jáne shaǵyn bıznes ókilderi zardap shegýi múmkin. Ózderińiz biletindeı, shaǵyn jáne orta kásipkerlik - el ekonomıkasynyń draıveri. Sebebi jeke kásipker retinde tirkelip nemese JShS (jaýapkershiligi shekteýli seriktestik) ashyp tirshilik etip júrgen jastar qanshama. ıAǵnı taıaqtyń eki ushy baryn umytpaǵan jón. Jalpy máseleden bizdiń de habarymyz bar. Talapty qatańdatý kerek», - deıdi ol.
Aıta ketsek, búgin elordadaǵy L. Gýmılev atyndaǵy Eýrazııa ulttyq ýnıversıtetinde «Konstıtýtsııalyq reformalardyń jańa Qazaqstan úshin mańyzdylyǵy» atty jıyn ótti.
Atalǵan sharadǵa Senat depýtaty jastarǵa 5 maýsymda ótetin referendýmnyń máni men mańyzyn túsindirip berdi.