Qazaqstanda stýdentter sany 1 mln-ǵa jýyqtaıdy — Ǵylym mınıstri
ASTANA. KAZINFORM — Eldegi jastar aqyryndap tehnıkalyq-kásiptik bilimge de bet buryp jatyr. Bul týraly elordada «Bolashaq beınesi: nátıjeden — jańa strategııaǵa» atty forýmda QR Ǵylym jáne joǵary bilim mınıstri Saıasat Nurbek málim etti.
— 500-ge jýyq bilim baǵdarlamalary jańadan qarastyrylyp, qazir bizdiń mınıstrlik osy baǵdarlamalarǵa qatysyp jatyr, mazmundar jańadan qarastyryldy. 27 kolledjimiz tuńǵysh ret halyqaralyq sertıfıkatsııalyq jáne akkredıtatsııalyq rásimderden ótip, halyqaralyq deńgeıdegi bilim berý orny dep rastaldy. Bul óte jaqsy úrdis. Nege deseńiz, buryn kolledjderimiz óz betimen qalyp qoıǵan bilim salasy boldy. Qazir Oqý-aǵartý mınıstrligi óte jaqsy betburysty bastady. Ár kásiptik bilim salasynyń óziniń akkredıtatsııalaý standarttary bar, — dedi S. Nurbek.
Sonymen qatar ol joǵary bilim salasyna da demografııalyq ózgerister áser etip jatqanyn aıtty.
— Bizdiń mınıstrlik 2022 jyly qurylǵan kezde jalpy kontıngent 618 myń stýdent bolǵan. Keıingi tórt jyldyń ishinde 740 myńǵa jetti, ıaǵnı 120 myńnan astam bala joǵary bilimge qosyldy. 2030 jyldan keıin 1 mln-ǵa jýyqtaıdy degen boljamymyz bar. Sondyqtan aqyryndap joǵary bilimge qosylyp jatqan stýdentterdiń sany ósip kele jatyr. Jalpy ustanymyz — joǵary bilimge qoljetimdilikti joǵary deńgeıde saqtap qalý. Meniń mınıstr jáne osy eldiń azamaty retindegi ustanymym — neǵurlym kóp balany joǵary ári kásiptik bilimge qol jetkizý deńgeıin ustap turýymyz kerek, — dedi vedomstvo basshysy.
Buǵan deıin bıyl stýdentter sany 740 myńnan asatynyn jazǵan edik.
Saıasat Nurbektiń aıtýynsha, Qazaqstan aldaǵy demografııalyq ósimge daıyn bolýy kerek.
