Qazaqstanda stýdentter men oqýshylardyń jumys isteý múmkindigi keńeıedi
ASTANA. QazAqparat - Stýdentter men joǵary synyp oqýshylaryna oqýdan bos ýaqytta qoǵamdyq jumystarǵa qatysý múmkindigi keńeıtiledi. Búgin Parlament Májilisiniń jalpy otyrysynda QR Eńbek jáne halyqty áleýmettik qorǵaý mınıstri Mádına Ábilqasymova osylaı aıtty, dep habarlaıdy QazAqparat.
Jalpy otyrys barysynda «Qazaqstan Respýblıkasynyń keıbir zańnamalyq aktilerine halyqtyń jumyspen qamtylýy jáne kóshi-qony máseleleri boıynsha ózgerister men tolyqtyrýlar engizý týraly» zań jobasy talqylandy.
«Zań jobasynda úsh kodekske, bes zańǵa ózgerister men tolyqtyrýlar engizý kózdelip otyr. Jobadaǵa ózgeristerge toqtalsaq, birinshiden, halyqty jumyspen qamtýǵa járdemdesý quraldaryn jetildirý kózdeledi. Jumyspen qamtýǵa júginý rásimderi jeńildetiledi. Jumys izdeýshiler endi jumyspen qamtý ortalyqtaryna «elektrondyq úkimet» veb-portalymen ǵana emes, sonymen HQKO-lar arqyly júgine alady. Jumysqa ornalasý rásimin tezdetý úshin jumyssyz azamat ózine usynylǵan jumysqa kelisetini nemese kelispeıtini týraly málimetti uıaly telefonmen, sondaı-aq elektrondyq túrde úsh jumys kúni ishinde habarlaı alady», - dedi Mádına Ábilqasymova.
Munymen qosa, memlekettik jáne úkimettik baǵdarlamalar aıasynda qurylatyn bos jumys oryndaryna monıtorıng júrgizý quzyreti ortalyq jáne jergilikti atqarýshy organdarǵa berilmek. Sonymen qatar, Eńbek mınıstrliginiń quzyreti bos jumys oryndary týraly aqparat usyný men oǵan monıtorıng júrgizý qaǵıdasyn bekitýmen tolyqtyrylady.
«Stýdentter men joǵary synyp oqýshylary úshin jazǵy demalys kezinde ǵana emes, oqýdan bos ýaqytta da qoǵamdyq jumystarǵa qatysý múmkindigi keńeıtiledi. Buǵan Eńbek kodeksinde shekteý joq», - dedi M. Ábilqasymova.
Osy oraıda mınıstr qoldanystaǵy erjelerge sáıkes, qoǵamdyq jumystarǵa barýǵa nıettiler úsh anyqtamany usynýy tıis ekenin sóz etti. Onyń ishinde oqý ornynan stýdent belgilengen merzimde demalysta júrgendigi týraly rastaıtyn anyqtama suralady.
