Qazaqstanda strımıng ındýstrııasy qalaı damyp keledi
ASTANA. KAZINFORM — Astana Media Week forýmy barysynda sarapshylar onlaın-kontent naryǵynyń qaıda bet alǵanyn aıtty.
– Biz kórermenge tegin qoljetimdi kontentpen qatar, aqyly jazylym nemese tranzaktsııalyq model usyný arqyly jańa tásilderdi engizip jatyrmyz. Bul ásirese kınoteatrlarǵa bara almaıtyn aımaq turǵyndary úshin mańyzdy múmkindik, – dedi Movie Service kompanııasynyń bas dırektory Anna Darmodehına.
Sondaı-aq ol salada antıpırattyq sharalardy kúsheıtip, zańdy kontent tutyný mádenıetin qalyptastyrý qajettigin aıtty. Al UNICO Play platformasynyń teń jetekshisi Anara Junýsova otandyq kontent naryǵynyń áli qalyptasý kezeńinde ekenin atap ótti.
– Kópshiligi dıstrıbýtsııanyń, ıaǵnı kontentti satý men taratý tetikterin tolyq túsinbeıdi. Biz qazir naryqty qalyptastyryp jatyrmyz. Kontent óndirýshiler óz ónimin ne úshin jáne qaıda arnap jasap jatqanyn naqty túsinýi qajet, – dedi ol.
Spıkerlerdiń pikirinshe, strımıng ındýstrııasy qazaqstandyq kórermenniń mádenı suranysyna qaraı beıimdelip, birtindep turaqty naryqqa aınalyp keledi.
Aıta keteıik, buǵan deıin Astana Media Week 2025 forýmy aıasynda ótken pikirtalasta jýrnalıst qyzmetindegi jasandy ıntellektiniń jumysy jaıly jazǵan edik.
Kamıla Múlik