Qazaqstanda «Streptotsıdtiń» bir serııasy ne sebepti satylymnan alynǵany belgili boldy
ASTANA. KAZINFORM — Zerthanalyq synaq nátıjesinde dáriniń sapasy talapqa saı kelmeıtini anyqtalǵan. Bul jóninde QR Densaýlyq saqtaý mınıstrligi resmı saýalymyzǵa joldaǵan jaýabynda málimdedi.
— Zerthanalyq synaq nátıjesinde dárilik zattyń sapasy normatıvtik qujat talaptaryna sáıkes kelmeıtini anyqtalyp, ony satylymnan alý jóninde sheshim qabyldandy, — delingen habarlamada.
Sonymen qatar mınıstrlik bul jaǵdaıda qoldanylatyn zań normasyn eske saldy.
— Qazaqstan Respýblıkasynyń «Halyq densaýlyǵy jáne densaýlyq saqtaý júıesi týraly» Kodeksiniń 259-baby 1-tarmaǵyna sáıkes, ýákiletti organ dárilik zattar men medıtsınalyq buıymdar densaýlyq saqtaý salasyndaǵy Qazaqstan Respýblıkasynyń zańnama talaptaryna sáıkes kelmeıtin jaǵdaılarda qoldanylýyn, satylýyn nemese óndirisin toqtatýǵa nemese tyıym salýǵa, sondaı-aq aınalymnan alýǵa nemese qoldanýyn shekteýge quqyly, — delingen resmı jaýapta.
Aıta keteıik buǵan deıin «Streptotsıd» dárisiniń bir serııasy satylymnan alynǵanyn jazǵanbyz. QR Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıtetiniń buıryǵyna saı, tyıym salynǵan dári — «Streptotsıd», tabletka, 300 mg, 10 tabletkadan qabyrshaqty qaptamada, 5 qabyrshaqty oramnan jasalǵan qatty qaǵaz qorapta. Óndirýshi — «Hımfarm» AQ. Bul serııanyń jaramdylyq merzimi — 2030 jylǵy tamyzǵa deıin.
Degenmen, streptotsıd dárilik zatynyń tirkeý kýáligi qoldanysta. Komıtettiń sheshimi tek 25080430 serııasyna qatysty qabyldanǵanyn atap ótý kerek. QR DSM málimetinshe, basqa serııalar shekteýsiz naryq aınalymynda.
