Ctomatologııalyq klınıkalar tekseristen keıin lıtsenzııasyn óz erkimen qaıtara bastady
ASTANA. KAZINFORM — Astanada jeke stomatologııalyq klınıkada em qabyldaý kezinde úsh jasar balanyń kóz jumýynan keıin Qazaqstanda 622 stomatologııalyq uıymǵa jospardan tys tekseris bastaldy. Tekserister Bas prokýratýranyń talaby negizinde júrgizilip jatyr. Buǵan balalarǵa jalpy narkozben em júrgizýge qatysty ata-analardyń shaǵymdary sebep bolǵan. Bul týraly QR Densaýlyq saqtaý mınıstrliginen Kazinform tilshisi surap-bildi.
Mınıstrliktiń Medıtsınalyq jáne farmatsevtıkalyq baqylaý komıtetiniń málimetinshe, tekserister Prezıdent Ákimshiliginiń, Úkimet apparatynyń tapsyrmasy jáne Bas prokýratýranyń talaby negizinde jospardan tys júrgizilip jatyr.
Qazirgi ýaqytta tekserýge alynǵan 622 stomatologııalyq klınıkanyń 392-si tekserildi.
Aralyq qorytyndyǵa sáıkes:
— 103 klınıkada zańbuzýshylyq anyqtalmady;
— 56 jaǵdaıda medıtsınalyq qyzmet kórsetý lıtsenzııasy erikti túrde qaıtaryldy;
— 20 jaǵdaıda ákimshilik sharalar qoldanylyp, medıtsınalyq qyzmet 1 aıdan 3 aıǵa deıin toqtatyldy. Onyń ishinde 3 jaǵdaıda jekelegen medıtsına qyzmetkerleriniń qyzmeti shekteldi.
Tekserý barysynda anyqtalǵan negizgi zańbuzýshylyqtar qatarynda mamandardyń jaramdy sertıfıkatsyz jumys isteýi, lıtsenzııalyq jáne biliktilik talaptarynyń saqtalmaýy, sondaı-aq kásibı jaýapkershilikti mindetti saqtandyrý sharttarynyń bolmaýy bar.
Jalpy 508 ákimshilik shara qoldanylyp, 85 mln 211 myń teńgeden astam aıyppul salyndy.
Densaýlyq saqtaý mınıstrliginiń málimetinshe, ázirge klınıkalardy tolyq jabý týraly sheshim qabyldanǵan joq. Tekserý jumystary jalǵasyp jatyr. Nátıjeleri boıynsha materıaldar óńirlik prokýratýralarǵa jáne QR Bas prokýratýrasyna joldanǵan.
2025 jyly komıtettiń aýmaqtyq departamentterine balalarǵa stomatologııalyq kómek kórsetýge qatysty 20 ótinish túsken.
Eske sala keteıik, qaıǵyly oqıǵa 2024 jylǵy 30 qazanda bolǵan. Jeke klınıkada jalpy narkozben 18 tisti emdegennen keıin úsh jasar qyz bala esin jımastan qaıtys boldy.
Bul is boıynsha sot 2025 jylǵy 22 jeltoqsanda aıaqtaldy. Anestezıolog dáriger kináli dep tanylǵanymen, Konstıtýtsııanyń 30 jyldyǵyna oraı jarııalanǵan raqymshylyqqa baılanysty negizgi jazadan bosatyldy. Sot barysynda ol ózine taǵylǵan aıyppen tolyq kelispeıtinin málimdegen.
Osy oqıǵadan keıin 2025 jyldyń jeltoqsanynda Densaýlyq saqtaý mınıstri Aqmaral Álnazarova balalarǵa jalpy narkozben jappaı tis emdeý jaǵdaılaryna qatysty pikir bildirip, elimizdegi barlyq stomatologııalyq klınıkalardy tekserý bastalatynyn habarlaǵan bolatyn.
