Qazaqstanda statıstıkalyq derekter arnaıy onlaın alańda talqylanady - Dálenov

ASTANA. QazAqparat - Qazaqstanda statıstıkalyq derekterdi esepteý ádistemesin talqylaý úshin onlaın alań qurylady. Bul týraly búgin Úkimet úıinde ótken baspasóz máslıhaty barysynda QR Ulttyq ekonomıka birinshi vıtse-mınıstri Rýslan Dálenov málim etti, dep habarlaıdy QazAqparat.

«Jarııalanǵan 3.0 Jańǵyrtý jańa joǵary tehnologııalyq salany, barlyq jerde ınnovatsııalardy qoldanýdy bildiredi. Tsıfrlyq ekonomıka damıdy, bul jahandyq trend. Jáne «jańa ekonomıka» statıstıkany aınalyp ótpeýi tıis. Sondyqtan biz ádistemeni zamanaýı halyqaralyq tájirıbe negizinde jetildirýdemiz. Sonymen qatar statıstıka saıtynda jańa «3.0 Jańǵyrtý» bólimin ashamyz. Statıstıka Qazaqstannyń úshinshi jańǵyrtylýyn esepteıtin bolady», - dedi Dálenov.

Ol statıstıkanyń aǵymdaǵy jumystary da qaıta jańartylatynyn, statıstıka saıtyndaǵy barlyq ádistemeler kórsetkishterdiń qalaı esepteletinin mysaldar arqyly ashyp kórsetetin bolatyndyǵyn basa aıtty. Bul úshin kórnekilik tolyq eseppen arnaıy aıdar ashylady, bul arqyly senimdilik pen keri baılanys arttyrylady.

«Biz statıstıkanyń ádistemesin jetildirý úshin onlaın alańy arqyly jańa qarym-qatynas formatyn damytýǵa daıynbyz. Jýrnalısterdi, ekonomısterdi, qoǵamdy, azamattardy talqylaýlarǵa belsendi qatysýǵa shaqyramyz», - dedi vıtse-mınıstr.

Sonymen qatar Rýslan Dálenov statıstıka saıtynda qyzyqty aıdarlar paıda bolatyndyǵyn, saıt jańartylyp, mobıldik qosymshasy jasalatyndyǵyn atap ótti.