Qazaqstanda statıstıka salasy qaǵazbastylyqtan arylady

Qazaqstanda statıstıka salasy qaǵazbastylyqtan arylady. Statıstıkany jınaý memlekettik derekqorlarǵa kóship jatyr. Bul týraly Ulttyq statıstıka bıýrosy basshysynyń orynbasary Jannat Dýbırova málim etti, dep habarlaıdy Kazinform. 

«Endi qaǵazben esep berý azaıady. Sonymen qatar statıstıka joǵary sapaly jáne ári senimdi bolady. Búginde statıstıkany aýdandar keıbir óńirler deńgeıinde egjeı-tegjeıli kórsetýde keri baılanys bar. Biz muny sandyq statıstıkalyq regıstrge ótý arqyly jasaımyz. Derekterdi jınaý – óte kúrdeli protsess. Ótken jyly 145 nysan boıynsha derekter jınaldy. Zańdy tulǵalar men jeke kásipkerler barlyq esepti qaǵaz túrinde tapsyrýy tıis boldy. Munyń bári kóp eńbek pen ýaqytty qajet etti», - dedi Jannat Dýbırova Astanada ótip jatqan DEMO DAY is-sharasy barysynda.

Onyń aıtýynsha, qazir statıstıka jınaý memlekettik derekqorlarǵa kóship jatyr.

«Mysaly, veterınarlar janýarlar týraly málimetterdi júıeli túrde toltyrady. Buryn biz bul aqparatty aýdan ákimderinen qolmen jınaıtynbyz. Derekterdiń dýblıajy boldy. Endi biz odan alystap, ákimshilik derekkózderge kóshemiz. Biraq bul úshin biz memlekettik derekter bazasyndaǵy derektiń sapasy óte joǵary deńgeıde ekendigine kóz jetkizýimiz kerek. Sondyqtan biz data-baqylaýshylar ınstıtýtyn iske qostyq, qazir memlekettik organdarmen jumys istep jatyrmyz», - deıdi ol.

Aıta keteıik, búgin elimizde statıstıka kúni.