Qazaqstanda startap-ekojúıesi qalaı damýda
ALMATY. QazAqparat - Almatyda ótetin «Jahandaný dáýirindegi tsıfrlyq kún tártibi 2.0» forýmyna kelgen sheteldik mamandar tsıfrlyq ındýstrııa, tehnopark jáne startap-ekojúıelerinin damýy týraly óz pikirlerin bildirdi, dep habarlaıdy QazAqparat tilshisi.
Tech Nation UK halyqaralyq konsaltıng basshysy Stefan Kıýsterdiń aıtýynsha, qazaqstandyq startap-ekojúıesi qarqyndy túrde damyp keledi.
«Qazir álemde barlyǵy óte qarqyndy túrde damyp keledi, biz sol trendterdi jyldam meńgerýimiz kerek. Jas qazaqstandyq ázirleýshilerge halyqaralyq tájirıbeli jetekshilerdiń kómegi qajet. Olar barlyq jobalardy ıdeıadan bastap daıyn startapqa deıin oqytyp, durys baǵyt berýge kómektesedi. Osy oraıda, Astana Hub zamanaýı tehnologııalar men álem boıynsha daryndy mamandardy biriktiretin basty ortalyq bolyp sanalady. Men bul forým jas IT-mamandary men iri kompanııalar, sondaı-aq úkimettiń basyn biriktirip, tsıfrlyq jáne ınnovatsııalyq sheshim shyǵarýǵa óz septigin tıgizetindigine senimdimin», - dedi Stefan Kıýster.
«Astana Hub» halyqaralyq IT-startaptardyń tehnoparki» keńesshisi Djozef Tsıglerdiń aıtýynsha, Qazaqstanǵa kóptegen tanymal álemdik IT kompanııalarmen seriktestik ornatý qajet.
«Ózge de korporatsııalarmen seriktestik ornatý jańa bastap jatqan startaperlerge durys baǵytta damýǵa kómektesedi. Ol úshin biz AQSh-tyń Kalıfornııa shtatyndaǵy «Sılıkondy alqapta» ornalasqan kompanııalarmen baılanys ornatqanymyz jón. Bul forým qazaqstandyq startap-ekojúıesin damytyp, ózge de sheteldik mamandarmen tájirıbe almasýǵa kómektesedi dep oılaımyn», - dedi Djozef Tsıgler.
Sonymen qatar, spıker kıbershabýyl qaýipsizdigine asa kóńil bólý kerektigin eskere ketti.
«Ol qazirgi tańda barlyq damyǵan elderdiń kúresip jatqan problemasy. Bul jerde kıberqaýipten saqtanatyn jetildirilgen tehnologııalar qajet», - dedi ol.
Aıta ketý kerek, 1 aqpan kúni Almatyda Eýrazııanyń ınnovatsııalyq ekojúıesine arnalǵan «Jahandaný dáýirindegi tsıfrlyq kún tártibi 2.0» forýmy ótedi. EAEO úkimeti jalpy tsıfrlandyrý máselesin talqyǵa salady. Forým uıymdastyrýshysy - Qazaqstan Respýblıkasynyń Aqparat jáne kommýnıkatsııalar mınıstrligi.
Elaman Turysbekov
