Qazaqstanda Starlink júıesinen bas tartqan mektepter kóbeıdi
ASTANA. KAZINFORM — Elimizdiń biraz mektebine Starlink ınternet júıesi tartyldy. Bul júıe qanshalyqty óziniń nátıjeligin kórsetti? Bul suraqqa Jasandy ıntellekt jáne tsıfrlyq damý mınıstrligi jaýap berdi.
— Qazaqstannyń bilim berý salasyn tsıfrlandyrýda Starlink spýtnıktik júıesin engizý mańyzdy kezeń boldy. Bastapqyda pılottyq joba aıasynda 2 myńǵa jýyq mektepti qamtý josparlanǵanymen, bul kórsetkish ýaqyt óte kele ózgeriske ushyrady. Bul ózgeris elimizdegi resmı baılanys operatorlarynyń jumysynyń jandanýymen jáne ınfraqurylymnyń damýymen tikeleı baılanysty, — delingen mınıstrliktiń Kazinform agenttigine bergen jaýabynda.
Atap aıtqanda, kóptegen eldi mekende talshyqty-optıkalyq baılanys jelileriniń (TOBJ) tartylýy jáne baılanys aıasynyń keńeıýi nátıjesinde keıbir mektepter dástúrli joǵary jyldamdyqty ınternetke qosylý múmkindigin aldy.
— Osyǵan baılanysty qazirgi kezde pılottyq joba aıasynda Starlink júıesimen jumys istep turǵan mektepter sany 1 068.
Bul júıe óziniń tıimdiligin tolyqtaı dáleldedi: ınternet jyldamdyǵy tómen nemese múldem joq shalǵaıdaǵy mektepter 150–200 Mbıt/s deńgeıindegi sapaly baılanysqa qol jetkizdi. Bul oqýshylar men muǵalimderdiń zamanaýı bilim berý platformalaryn kedergisiz qoldanýyna jol ashty, — dep atalyp ótken vedomstvo aqparatynda.
Eske salsaq, 2024 jyly jazda eldegi eki myńǵa jýyq mektep Starlink ınternetine qosylǵany málim boldy.
