Qazaqstanda Starlink Direct to Cell spýtnıktik baılanys tehnologııasy synaqtan sátti ótti
ASTANA. KAZINFORM — Qazaqstan álemdegi alǵashqy elderdiń biri qatarynda 2026 jyldyń aqpan aıynan bastap SpaceX kompanııasynyń Direct-to-Cell (D2C) spýtnıktik baılanys tehnologııasyn kezeń-kezeńimen engizýdi bastaıdy. Bul týraly JI jáne tsıfrlyq damý mınıstrligi habarlady.
Kúzde Memleket basshysy Qasym-Jomart Toqaevtyń Amerıka Qurama Shtattaryna resmı sapary barysynda mańyzdy kelissózder ótip, elimizge álemdik ozyq tehnologııalarǵa jol ashatyn birqatar qujatqa qol qoıyldy. Solardyń biri Starlink kompanııasynyń Direct to Cell spýtnıktik baılanys tehnologııasyn engizý týraly kelisim.
Búgin Qazaqstan Respýblıkasynyń Premer-Mınıstriniń orynbasary — jasandy ıntellekt jáne tsıfrlyq damý mınıstri Jaslan Madıev, Beeline Qazaqstan kompanııasynyń prezıdenti Evgenıı Nastradın jáne SpaceX (Starlink) kompanııasynyń ókilderi Ortalyq Azııada alǵash ret Direct-to-Cell tehnologııasyn synaqtan ótkizdi.
Synaq kezinde Starlink spýtnıktik jelisi men Beeline Qazaqstannyń jerústi mobıldi jelisi biriktirilip, qarapaıym uıaly telefon arqyly SMS-habarlamalar men messendjer arqyly qońyraýlar sátti jiberildi.
Direct-to-Cell tehnologııasy qosymsha qurylǵylardy qajet etpeı, standartty mobıldi telefondy tikeleı spýtnıkke qosýǵa múmkindik beredi. Bul dástúrli baılanys ınfraqurylymy joq dala, taýly jáne shalǵaı óńirlerde de baılanys qoljetimdi bolatynyn bildiredi.
Tehnologııa kezeń-kezeńimen engiziledi: bastapqy kezeńde paıdalanýshylar SMS-habarlamalar jibere alady, al kelesi kezeńderde dybystyq baılanys pen basqa da servıster qoljetimdi bolady. 2027 jyly negizgi qyzmet túrleriniń basym bóligi iske qosylady dep josparlanyp otyr.
— Bul bastama Memleket basshysynyń eldi tolyq tsıfrlandyrý jónindegi tapsyrmasyna sáıkes keledi. Barlyq óńirde tsıfrlyq qyzmetterdiń senimdi jumys isteýi úshin zamanaýı baılanys arnalary qajet. Spýtnıktik baılanys — osy arhıtektýranyń mańyzdy bóligi. Eń maǵyzdysy — árdaıym baılanysta bolý múmkindigi. Tótenshe jaǵdaılarda, shalǵaı óńirlerde nemese jolda bul qyzmet túri sheshýshi ról atqarady. Mundaı tehnologııalar tsıfrlyq turaqtylyqty arttyryp, azamattardyń ómir sapasyn jaqsartady», — dedi QR Premer-Mınıstriniń orynbasary — jasandy ıntellekt jáne tsıfrlyq damý mınıstri Jaslan Madıev.
Búgingi tańda mundaı jobalar álemniń sanaýly elderinde ǵana júzege asyrylýda. Qazaqstan — Ortalyq Azııada Direct-to-Cell tehnologııasyn synaqtan ótkizgen alǵashqy memleket.
Bul tehnologııa baılanys pen qaýipsizdik turǵysynan erekshe mańyzdy. Ol qutqarý jáne medıtsınalyq qyzmetterge, týrıster men shalǵaı eldi meken turǵyndaryna jerústi jelileri bolmaǵan jaǵdaıda da turaqty baılanysty qamtamasyz etedi.
Budan buryn Qazaqstanda Starlink spýtnıktik ınterneti resmı túrde iske qosylǵany belgili boldy. Qyzmettiń aılyq tarıfi 23 myń teńgeden bastalsa, termınal baǵasy shamamen 104 myń teńge.