Qazaqstanda standarttaý salasyndaǵy ulttyq standarttar sany 9,8 myńǵa jýyqtady
ASTANA. KAZINFORM- Qazaqstanda 2025 jyly jasandy ıntellekt salasynda alǵash ret jeti ulttyq standart bekitildi. Olar arhıtektýrany, derekterdi, táýekelderdi basqarýdy jáne qupııalylyqty qamtıdy, dep habarlaıdy QR Saýda jáne ıntegratsııa mınıstrliginiń baspasóz qyzmeti.
Baspasóz qyzmetiniń málimetterine qaraǵanla, qazir eldegi Normatıvtik tehnıkalyq qujattardyń biryńǵaı qorynda 76 174 qujat bar, onyń 9 789-y ulttyq standart. Ulttyq standarttardyń qoldanylý deńgeıi 74%-dy quraıdy.
Bul týraly 2026 jylǵy 14 qazanda Astanada Dúnıejúzilik standarttar kúnine oraılastyrylǵan dóńgelek ústelde aıtyldy. Qatysýshylar ulttyq standarttaý júıesin damytý, otandyq óndirýshilerdi qoldaý, ınnovatsııalyq tehnologııalardy engizý jáne Qazaqstannyń eksporttyq áleýetin keńeıtý máselelerin talqylady.
Kezdesý barysynda standarttaý salasyndaǵy jumys nátıjeleri tanystyrylyp, salany odan ári damytýdyń negizgi basymdyqtary belgilendi.
QR Saýda jáne ıntegratsııa mınıstrligi Tehnıkalyq retteý jáne metrologııa komıtetiniń tóraǵasy Janna Esenbekova atap ótkendeı, búginde standarttaýdyń róli edáýir artyp, eldiń tehnologııalyq jáne ekonomıkalyq damýynyń mańyzdy quraldarynyń birine aınalyp keledi.
-Búginde standarttaý tek daıyn ónimge qoıylatyn talaptar júıesi bolýdan qalýda. Ol tehnologııalyq damýdyń, óndiristi, ınvestıtsııalardy jáne jańa naryqtardy qoldaýdyń quralyna aınalyp keledi. Biz qalyptasqan tájirıbeni bekitetin standarttan, tehnologııalardyń damýyna aldyn ala jaǵdaı jasaıtyn standartqa kóship jatyrmyz, – dep atap ótti Janna Esenbekova.
Basymdyqtardyń biri – ınvestıtsııalyq jobalardy bastapqy kezeńderinen bastap súıemeldeý. Óndiristi daıyndaý kezinde kásiporyndarǵa tehnıkalyq talaptardy pysyqtaýǵa, standarttardy tańdaýǵa jáne sapany qamtamasyz etý úshin qajetti ınfraqurylymdy anyqtaýǵa kómek kórsetiledi.
Munaı-hımııa salasynda zamanaýı óndiris tehnologııalaryn eskere otyryp, kópqabatty polıetılen úldirine arnalǵan standart ázirlenip jatyr. Sondaı-aq «QazStandarttyń» Alatau City úshin normatıvtik bazany daıyndaýǵa qatysýy talqylanyp jatyr.
Kúndelikti ómirdegi ónimder men qyzmetterdiń sapasy men qaýipsizdigine erekshe nazar aýdarylady. Beınebaqylaý júıelerine, temperatýrany baqylaı otyryp salqyndatylǵan jáne muzdatylǵan júkterdi jetkizýge, elektrondyq medıtsınalyq kartalar men jazbalarǵa arnalǵan standarttar qabyldandy.
Elektr qýattaý stantsııalaryna da standarttar bekitildi. Olar berilgen elektr energııasyn senimdi esepke alý úshin qajetti tekserý men metrologııalyq qamtamasyz etýge qoıylatyn talaptardy qarastyrady.
-Jasandy ıntellekt pen ǵylymı qyzmetke arnalǵan normatıvtik baza da damyp keledi. 2026 jyly ázirlemelerdiń tehnologııalyq daıyndyǵyn baǵalaýdy, zertteýlerdi tsıfrlandyrýdy jáne ǵylymı derektermen jumys isteý qaǵıdattaryn qarastyratyn «Ǵylymı zertteýler jáne óndiriske qoıý» standarty qabyldandy,-delingen habarlamada.
Osyǵan deıin Qazaqstanda turǵyn úı sapasynyń biryńǵaı standartyn engizý usynylǵany týraly jazdyq.
