Qazaqstanda standartqa sáıkes kelmeıtin reseılik azyq-túlik ónimderi anyqtaldy
ASTANA. 11 sáýir. QazAqparat - QR Indýstrııa jáne jańa tehnologııalar mınıstrligi Tehnıkalyq retteý jáne metrologııa komıtetiniń ınspektorlary bıylǵy jyldyń birinshi toqsanynda kásipkerlerdi tekserý barysynda standarttarǵa saı kelmeıtin azyq-túlik ónimderin anyqtady.
Astanada ótken baspasóz máslıhatynda atalǵan komıtettiń tóraǵasy Ryskeldi Sátbaev azyq-túlik salasyndaǵy 94 kásiporyn tekserilgenin jáne 53-inde zań buzýshylyqtar anyqtalǵanan sóz etti. Inspektorlar bundaı bıznesmenderge 4 mln. teńge kóleminde ákimshilik aıyppul salǵan kórinedi. Sonymen qatar 244 890 219 teńge somasyndaǵy azyq-túliktiń 712 partııasyn saýdalaýǵa tyıym salyndy.
Máselen, Aqmola oblysynda reseılik shujyqtar («Tsarıtsyno saýda markasynyń Posolskıı servelaty», «Partner F») sáıkestik sertıfıkatynsyz satylyp kelgen. Zerthanalyq tekserýler barysynda pisirilip, qaqtalǵan shujyqtyń quramynda sorpa bolǵan, al jartylaı qaqtalǵany standartqa tolyq saı kelmeıdi eken.
«Tekserý qorytyndysy boıynsha 366 502 teńgeniń ónimin satýǵa tyıym salý týraly uıǵarym berildi»,-dedi R. Sátbaev.
Sonymen qatar ShQO-da jeke kásipkerde tez ázirlenetin «Rollton» kespesinde (Reseıde óndirilgen) sáıkestik sertıfıkaty bolmaǵan jáne tańbalaý tártibi de buzylyp, memlekettik tilde aqparat jazylmaǵan. Kásipker ákimshilik jaýapkershilikke tartyldy.
Komıtet basshysy ınspektorlar reseılik azyq-túliktermen qatar Italııa, Grýzııa, Qytaı, Vetnam, Taıland ónimderinen standarttardyń sáıkes kelmeýi faktilerin anyqtaǵanyn jetkizdi.
