Qazaqstanda spýtnıktik ınternettiń jańa operatorlary paıda bolmaq
ASTANA. KAZINFORM – 2027 jyly Qazaqstan naryǵyna Amazon LEO jáne Shanghai SpaceSail spýtnıktik ınternet operatorlary shyǵýy múmkin. Bul týraly Quryltaı depýtattarynyń saýalyna Premer-mınıstriniń orynbasary - Jasandy ıntellekt jáne tsıfrlyq damý mınıstri Jaslan Mádıevtiń jaýabynda aıtylǵan.
Onyń atap ótýinshe, spýtnıktik baılanys jerústi ınfraqurylymyn salý tehnıkalyq turǵydan qıyn nemese ekonomıkalyq jaǵynan tıimsiz shalǵaı jáne jetý qıyn eldi mekenderdi ınternetpen qamtamasyz etedi.
- 2024 jylǵy qazanda OneWeb kompanııasy Almaty oblysynyń Kókterek aýylynda jerústi túıindestirý stantsııasyn iske qosty. Al 2025 jylǵy qańtardan bastap spýtnıktik ınternet qyzmetterin kórsetip keledi. «Qoljetimdi ınternet» Ulttyq jobasy aıasynda 2025 jyly shalǵaıdaǵy 329 aýyl OneWeb spýtnıktik ınternetimen qamtamasyz etildi. 2026 jyly OneWeb termınaldaryn paıdalana otyryp, qoǵamdyq Wi-Fi núkteleri ornatylǵan aýyldardyń sany 362-ge deıin ulǵaıtyldy. Ákimdikterdiń ótinishteri boıynsha qosymsha eldi mekenderdi qosý máselesi qarastyrylyp jatyr, - dedi vıtse-premer.
Úkimet basshysy orynbasarynyń dereginshe, Starlink termınaldary 1 798 mektepte ornatylǵan. Sondaı-aq olardy azamattar jáne kásipkerler, onyń ishinde shalǵaı jerlerde jáne týrıstik oryndarda paıdalanady. Starlink jáne OneWeb kompanııalary kommertsııalyq negizde qyzmet kórsetý úshin qajetti tehnıkalyq talaptardy, onyń ishinde arnaıy jedel-izdestirý is-sharalarynyń (AJІSh) jáne telekommýnıkatsııa jelilerin basqarý ortalyǵynyń talaptaryn oryndap, tıisti jerústi ınfraqurylymyn qurdy. 2026 jylǵy 2 qazanda kompanııalar qajetti lıtsenzııalardy alyp, pılottyq rejımnen kommertsııalyq negizde baılanys qyzmetterin kórsetýge kóshti.
- 2027 jyly Qazaqstan naryǵyna Amazon LEO jáne Shanghai SpaceSail operatorlarynyń shyǵýy kútiledi. Spýtnıktik tehnologııalardy damytý halyqtyń áleýmettik nysandardyń jáne bıznestiń ınternetke qoljetimdiligin keńeıtýge, sondaı-aq jerústi ınfraqurylymy zaqymdanǵan jaǵdaıda rezervtik baılanys arnalaryn qamtamasyz etýge múmkindik beredi, - dedi Jaslan Mádıev.
Shanghai SpaceSail Technologies Qytaıdyń spýtnıktik ınternet kompanııasy.
Amazon Leo (burynǵy Project Kuiper) spýtnıktik ınternet júıesi.
Aıta keteıik, elimizde 51 baǵyt boıynsha qatynaıtyn jolaýshylar poıyzdary Starlink spýtnıktik ınternetine qosyldy.
