Qazaqstanda spýtnık komponentterin shyǵaratyn hab qurylýy múmkin: Koreıalyq CONTEC ınvestıtsııa salmaq
ASTANA. KAZINFORM — Qazaqstan men Ońtústik Koreıa ǵarysh salasyndaǵy yntymaqtastyqty keńeıtpek. Taraptar Qazaqstanda spýtnık komponentterin shyǵaratyn óndiristik hab qurý, birlesken jobalarǵa ınvestıtsııa tartý jáne ǵaryshtyq derekterdi jasandy ıntellekt arqyly óńdeý máselelerin talqylady. Bul týraly Úkimettiń baspasóz qyzmeti málim etti.
Seýlde QR Premer-mınıstriniń orynbasary — jasandy ıntellekt jáne tsıfrlyq damý mınıstri Jaslan Madıev Ońtústik Koreıanyń ǵarysh salasyndaǵy negizgi kompanııalarynyń biri — CONTEC Space Group kompanııasynyń qurastyrý-synaý keshenine bardy. Kompanııanyń basqarma tóraǵasy Lı Sonhımen kezdesýde birlesken tehnologııalyq jáne ınvestıtsııalyq jobalardyń perspektıvalary talqylandy.
Kelissózder barysynda CONTEC kompanııasynyń «Ǵalam» jobasyna ınvestıtsııa salý josparlary, spýtnıkter men olardyń komponentterin birlesip óndirý, sondaı-aq jerústi stansalarynyń jelisin damytý múmkindikteri qaraldy.
Perspektıvaly baǵyttardyń biri Qazaqstanda spýtnık komponentterin shyǵaryp, keıin olardy Ortalyq Azııa, Taıaý Shyǵys jáne Eýropa naryqtaryna jetkizetin óndiristik hab qurý. Sondaı-aq iri gabarıtti jerústi antenna júıeleriniń óndirisin lokalızatsııalaý máselesi qarastyrylyp jatyr.
Jasandy ıntellektini qoldana otyryp, spýtnıktik sýretterdi óńdeý tehnologııalaryn damytýǵa da erekshe nazar aýdaryldy. JI qoldaný Jerdi qashyqtan zondtaý derekterin taldaý jáne olardy praktıkalyq mindetterdi sheshýge paıdalaný múmkindikterin keńeıtedi.
CONTEC Space Group quramyna CONTEC, Asia Pacific Satellite Corporation jáne Texas Space Communication kompanııalary kiredi. Top Ońtústik Koreıanyń memlekettik spýtnıkterine arnalǵan borttyq kompıýterlerdi jetkizedi jáne álem boıynsha, sonyń ishinde Chılı, AQSh, Ońtústik Afrıka Respýblıkasy men Avstralııada ornalasqan 17 jerústi stansasyn basqarady.
Aldaǵy ýaqytta Qazaqstanda CONTEC enshiles kompanııasyn qurý jaıy jáne áriptestik sharttaryn odan ári pysyqtaý máselesi qarastyrylmaq. Yntymaqtastyqtyń egjeı-tegjeıin Qazaqstan Respýblıkasy Prezıdentiniń Koreıa Respýblıkasyna memlekettik sapary barysynda tanystyrý josparlanýda.
Talqylanyp jatqan bastamalardy júzege asyrý qazaqstandyq kásiporyndardyń ǵarysh tehnıkasyn óndirý múmkindikterin keńeıtýge, spýtnıktik derekterdi óńdeý quzyretterin damytýǵa jáne jańa eksporttyq naryqtarǵa shyǵýǵa yqpal etedi.
Aıta keteıik, buǵan deıin Ońtústik Koreıada Alatau City-de iri jobalardy iske asyrý múmkindigi talqylanǵan bolatyn.
