Qazaqstanda sporttyq BAQ-qa býkmekerlik keńselerdi áleýmettik jelide jarnamalaýǵa tyıym salynady
ASTANA. KAZINFORM – Qazaqstandyq sporttyq buqaralyq aqparat quraldary býkmekerlik keńselerdiń jarnamasyn óz saıttarynda ornalastyra alady, alaıda áleýmettik jelilerde mundaı jarnama jarııalaýǵa ruqsat joq. Bul týraly QR Týrızm jáne sport mınıstrliginiń Oıyn bıznesin jáne lotereıany retteý komıteti Kazinform saýalyna bergen jaýabynda málimdedi.
Komıtettiń túsindirýinshe, «Jarnama týraly» zań tek sport taqyrybyna mamandanǵan tirkelgen buqaralyq aqparat quraldarynda býkmekerlik keńseler men totalızatorlardy jarnamalaýǵa múmkindik beredi. Alaıda bul erekshelik mundaı BAQ-tyń áleýmettik jelilerdegi paraqshalaryna qoldanylmaıdy.
– Instagram, TikTok, «VKontakte», Threads jáne Telegram áleýmettik jelileri onlaın-platformalar bolyp sanalady. Óıtkeni kontent pen jarnama paıdalanýshy jasaǵan akkaýnt arqyly ornalastyrylady. Osyǵan baılanysty býkmekerlik keńseler men totalızatorlardyń áleýmettik jeliler men messendjerlerdegi jarnamasyna tyıym salynady, – delingen komıtet jaýabynda.
Osylaısha, sporttyq BAQ býkmekerlik keńselerdiń jarnamasyn óz saıtynda ornalastyrýǵa quqyly bolǵanymen, Instagram, TikTok, Telegram, Threads nemese «VKontakte» jelilerinde jarııalaı almaıdy.
Erekshelikter zańnamada naqty belgilengen jaǵdaılarǵa ǵana qatysty. Olardyń qatarynda lıtsenzııasy bar býkmekerlik keńselerdiń resmı saıttary jáne otandyq telearnalardaǵy halyqaralyq sporttyq jarystardyń tikeleı kórsetilimderi bar.
Aıta keteıik, endi medıtsınalyq qyzmetterdiń de jarnamasyna talap qatańdaıdy.
