Qazaqstanda sportty qarjylandyrýdyń jańa tetikteri engizilýde
ASTANA. KAZINFORM – Týrızm jáne sport mınıstrligi sport salasyn qarjylandyrý tetikterin jetildirý jáne bıýdjet qarajatyn tıimdi basqarý baǵytynda júıeli jumystar júrgizip jatyr.
Mınıstrliktiń bastamasymen óńirlik sport basqarmalary men ulttyq sport federatsııalaryna «1 óńir – 1 klýb – 1 sport túri» qaǵıdaty usynyldy. Bul qadam qarjylandyrýdyń qaıtalanýyn boldyrmaýǵa jáne shyǵyndardy ońtaılandyrýǵa baǵyttalǵan.
Bıyl maýsym aıynda kúshine engen jańa «Dene shynyqtyrý jáne sport týraly» zańǵa sáıkes, komandalyq sport túrlerindegi kásibı klýbtardy memlekettik qarjylandyrýǵa shekteý qoıyldy. Bul sheshim qarjynyń ashyq ári tıimdi jumsalýyn qamtamasyz etip, klýbtardy balama qarjy kózderin tartýǵa yntalandyrýdy kózdeıdi.
Sonymen qatar zańda sheteldik sportshylardy ustaýǵa jáne olarǵa eńbekaqy tóleýge memlekettik jáne kvazımemlekettik qarajatty paıdalanýǵa tyıym salynǵan. Bul bastama jergilikti kadrlardy qoldaý jáne ulttyq sport mektepterin damytý maqsatynda qabyldanǵan.
Mınıstrlik jańartylǵan zań aıasynda sportty strategııalyq turǵyda damytýǵa baǵyttalǵan birqatar mańyzdy normalardy engizdi:
- Basym sport túrleriniń tizimi bekitildi – Olımpıada, Paralımpıada, Azııa oıyndaryndaǵy jetistikter eskerile otyryp, 60-tan astam sport túri tańdaldy;
- Ulttyq sport túrleri alǵash ret basym baǵyttar qataryna engizilip, júıeli qoldaýǵa ıe boldy;
- «Múgedektigi bar sportshyny súıemeldeýshi» uǵymy zańmen retteldi – І toptaǵy múgedektigi bar sportshylardyń jattyǵý men jarystarǵa qoljetimdiligi qamtamasyz etiledi;
- Sport uıymdary basshylaryna rotatsııa júıesi engizildi – endi basshylar 5 jyl merzimge taǵaıyndalyp, kadr jetispeıtin óńirlerde kórshiles aýdandar arasyndaǵy aýystyrýlar qarastyrylady.
Mınıstrliktiń málimdeýinshe, bul reformalar otandyq sportty turaqty ári tıimdi modelmen damytýǵa baǵyttalǵan. Zańda kózdelgen normalar memlekettik saıasat aıasynda iske asyrylady jáne olardyń oryndalýy barlyq deńgeıde qamtamasyz etiledi.
Aıta keteıik, elimizde alǵash ret sportshylar daıarlaýdyń ǵylymı modeli engizildi.