Qazaqstanda sporttaǵy dopıngpen kúres boıynsha táýelsiz Komıssııa quryldy
ASTANA. QazAqparat - Astanada Ulttyq Olımpıada Komıtetiniń bastamasymen dopıngke qarsy Táýelsiz komıssııa quryldy. Táýelsiz komıssııanyń jumysy Qazaqstandaǵy dopıngke qarsy júıeniń jetilýine yqpaldasady, dep habarlady QR UOK baspasóz qyzmetinen.
Qazir Komıssııa óz jumysyn Almatyda ornalasqan Ulttyq dopıngke qarsy ortalyq pen dopıngke qarsy zerthananyń jumysyn baqylaýǵa baǵyttaıdy. Olardyń dopıngke qarsy halyqaralyq qozǵalystarmen ózara árekettestiginiń mehanızmderin qarastyrady.
«Dopıngke qarsy Táýelsiz komıssııa qurýdyń negizgi maqsaty Qazaqstan Respýblıkasyndaǵy dopıngke qarsy baqylaý júıesin jetildirý men «taza sportshylardy» qorǵaýdy kúsheıtý bolmaq. Komıssııa músheleriniń qatarynda sport qoǵamdastyqtarynyń jáne úkimettik emes uıymdardyń ókilderi, medıtsına qyzmetkerleri, zańgerler bar. Keıin onyń quramyna halyqaralyq deńgeıdegi dopıngke qarsy qozǵalys sarapshylaryn engizýdi josparlap otyrmyz. Qazaqstandyq táýelsiz Komıssııa dúnıejúzilik dopıngke qarsy agenttikpen (WADA) yqpaldasyp jumys isteıdi», - dep atap ótti Qazaqstannyń Ulttyq Olımpıada Komıtetiniń prezıdenti Tımýr Qulybaev.
