Qazaqstanda sportpen júıeli túrde aınalysatyn halyqtyń sany 20 paıyzǵa jetken joq
ASTANA. Sáýirdiń 19-y. QazAqparat /Rýslan Ǵabbasov/ - Qazaqstanda sportpen júıeli túrde aınalysatyn halyqtyń sanyn 30 paıyzdan astam kórsetkishke jetkizý shart.
Bul týraly búgin Astanada buqaralyq dene shynyqtyrý men sport máselelerine arnalǵan halyqaralyq ǵylymı-tájirıbelik konferentsııa barysynda QR Týrızm jáne sport mınıstrligi Sport komıtetiniń tóraǵasy Elsııar Qanaǵatov málim etti, dep habarlaıdy QazAqparat.
«Búginde Qazaqstanda halyqtyń 16 paıyzy sportpen júıeli túrde aınalysady. Atap aıtqanda sportpen shuǵyldanatyndardyń kórsetkishin eki esege asyrý qajet. Bul maqsatqa birlesken sharalar arqyly jáne ortalyq, jergilikti organdardyń belsendi jumystary arqyly tıisti ınstıtýttarmen yntymaqtastyqta ǵana qol jetkizýge bolady», dedi komıtet basshysy. E. Qanaǵatovtyń sózine qaraǵanda, buqaralyq sportty damytý boıynsha úkimettik is-qımyl jospary ázirlengen jáne ol qazirgi kezde mınıstrlikter men jergilikti atqarý organdarynda qaralýda.
«QR Prezıdentiniń Qazaqstan halqyna Joldaýyn iske asyrý maqsatynda buqaralyq dene shynyqtyr men joǵary jetistikter sportynyń teorııasy men tájirıbesi: úrdisteri, problemalary, bolashaǵy» atty konferentsııanyń barysynda elimizdiń jáne Reseı, Belarýs memleketterinen kelgen mamandar tájirıbelik sabaqtar ótkizip, «Sport psıhologııasy», «Sportshylardy daıarlaý ádistemesi», «Balalar men halyq arasynda buqaralyq sportty damytý jáne zııandy ádetterdiń aldyn alý» taqyryptaryndaǵy máselelerdi talqylamaq.
